Što aznačaje zahadkavy kod R99 u pryčynach śmierci Uładzimira Makieja i Vitolda Ašurka?
Z 20 śniežnia ŭ bazach dadzienych «Kibierpartyzan» źjaviłasia infarmacyja pra pamierłych žycharoŭ Biełarusi z aficyjnymi pryčynami śmierci — až da 2024 hoda. U jakaści prykładaŭ chakiery apublikavali niekalki zapisaŭ. Ź ich vynikaje, što eks-ministr zamiežnych spraŭ Uładzimir Makiej, eks-ministr transpartu i kamunikacyj Alaksiej Aŭramienka, a taksama pamierły ŭ kałonii palitviazień Vitold Ašurak pajšli z žyćcia ŭ vyniku «inšych niedakładna paznačanych i nieŭdakładnienych pryčyn śmierci». Što kankretna heta moža aznačać, daviedałasia ŭ sudmiedekśpiertki vydańnie «Lusterka».
U infarmacyi pra pryčyny śmierci, dastupnaj «Kibierpartyzanam», kod R99 adpaviadaje rasšyfroŭcy «inšyja niedakładna paznačanyja i nieŭdakładnienyja pryčyny śmierci» ź Mižnarodnaj kłasifikacyi chvarob.
Pa słovach Nadziei Hurmančuk, sudmiedekśpiertki z bolš čym dziesiacihadovym vopytam, jaho zvyčajna vykarystoŭvajuć u vypadkach, kali było praviedziena ŭskryćcio cieła, kab vyśvietlić dakładnuju pryčynu śmierci čałavieka, ale na momant uskryćcia pryčyna śmierci zastajecca dakładna nie zrazumiełaj abo vyklikaje sumnievy.
«Kod R99 stavicca tolki ŭ situacyi, kali na momant uskryćcia, to-bok daśledavańnia trupa, pryčyna śmierci nie zrazumiełaja abo vyklikaje sumnievy.
Što heta značyć? Što doktar ci nie viedaje pryčynu śmierci, ci moža być u joj nie ŭpeŭnieny. I kab dakładna jaje vyznačyć, jamu patrebnyja vyniki dadatkovych daśledavańniaŭ. Jon biare ŭzory na dadatkovyja daśledavańni: heta moža być sudova-histałahičnaja ekśpiertyza, sudova-chimičnaja ekśpiertyza i inšyja — u zaležnaści ad taho, jakuju pryčynu śmierci doktar padazraje.
Što mienavita jon moža padazravać: zachvorvańnie ci hvałtoŭnuju pryčynu śmierci, — na hetym etapie nieviadoma nikomu, akramia samoha doktara», — tłumačyć Hurmančuk.
Kali ŭ doktara jość padazreńni pra hvałtoŭnuju pryčynu śmierci, to na hetym etapie, paśla ŭskryćcia, jon abaviazany nieadkładna pra heta paviedamić pravaachoŭnym orhanam. Ale ŭ daviedcy, pa słovach ekśpiertki, usio adno budzie fihuravać dyjahnaz R99.
Hurmančuk kaža, što dadatkovyja ekśpiertyzy zvyčajna zajmajuć kala 30 dzion. Uvieś hety čas u bazie «visić» papiaredniaja pryčyna śmierci — toj samy kod R99. Pamianiać jaho mohuć tolki tady, kali pryjduć vyniki dadatkovych daśledavańniaŭ i vydaduć kančatkovuju daviedku ab śmierci svajakam.
«Napeŭna, «Kibierpartyzany» rana vyjavili bazy, — miarkuje Hurmančuk. — Treba było jašče pačakać, bo heta ŭsio ŭnosicca ŭ sistemu nie adrazu, a z časam. U budučyni kod R99, jak praviła, mianiajuć na narmalnuju, dakładnuju kadziroŭku dyjahnazu».
Pry hetym Hurmančuk zaŭvažaje, što ŭ vypadku śmierciaŭ takich vysokapastaŭlenych ludziej, jak ministraŭ, prastaŭleńnie koda R99 całkam vytłumačalnaje.
«Heta ŭ cełym zvyčajnaja situacyja, jakaja sama pa sabie nie daje mahčymaści mierkavać pra pryčynu śmierci: hvałtoŭnuju ci nie, heta značyć ad jakoha-niebudź zachvorvańnia.
Miarkuju, što ŭ vypadku Makieja, to-bok značnaj piersony, doktar prosta pierastrachavaŭsia, navat kali jamu i mahła być zrazumiełaja pryčyna śmierci, — miarkuje surazmoŭca. — Kab nie atrymałasia tak, što jon napisaŭ kančatkovy dyjahnaz, a potym pryjšli vyniki dadatkovych daśledavańniaŭ, i tam akazałasia niešta inšaje, što daje padobnuju marfałahičnuju karcinu na uskryćci, — tady pryjšłosia b mianiać dakumienty, vypraŭlać, bo ŭskryćcio robicca praktyčna va ŭsich vypadkach. Uvohule, kab nie było nijakich roznačytańniaŭ, roznahałośsiaŭ, za jakija pryjdziecca apraŭdvacca».
Stała viadoma aficyjnaja pryčyna śmierci Makieja, Ašurka i Tarajkoŭskaha
Imaviernaja pryčyna śmierci Uładzimira Makieja — suicyd
Stali viadomyja padrabiaznaści trahičnaj śmierci ministra Aŭramienki. Tut taksama śled KDB
«Hetaja situacyja moža pahražać mnie poŭnym p***com». Doktarka škłoŭskaj kałonii, dzie pamior Ašurak, u panicy chacieła zvolnicca
Były viazień škłoŭskaj kałonii raskazaŭ, chto moža być datyčny da hibieli Vitolda Ašurka
60‑hadovaja pjanaja biełaruska pieratvaryła palot z Paryža ŭ Vilniu ŭ kašmar3
Kamientary