Vyniki novaha daśledavańnia pakazali, što papularnyja preparaty dla źnižeńnia vahi paśpiachova zmahajucca z rasstrojstvami, źviazanymi z užyvańniem ałkaholu.
Vyniki novaha daśledavańnia, praviedzienaha vučonymi ź Finlandyi i Šviecyi, pakazała, što preparaty Ozempic, Wegovy i Victoz, jakija imitujuć harmon GLP-1 i ŭ pieršuju čarhu nakiravany na lačeńnie cukrovaha dyjabietu druhoj stupni i atłuścieńnia, mohuć dapamahčy z ałkaholnaj zaležnaściu.
Jak pišuć aŭtary ŭ svaim artykule ŭ časopisie JAMA Psychiatry, jany praanalizavali miedycynskija zapisy 228 tysiač čałaviek z dyjahnazam «rasstrojstva, źviazanaje z užyvańniem ałkaholu» za pieryjad z 2006 pa 2023 hod. Va ŭsich hetych pacyjentaŭ taksama było atłuścieńnie ci dyjabiet druhoha typu.
Daśledavańnie vyjaviła cikavy efiekt siemahłutydu (aktyŭny inhredyjent u Ozempic i Wegovy) i lirahłutydu (aktyŭny inhredyjent u Victoza) na spažyvańnie ałkaholu i źviazanyja ź im prablemy. Tak, ludzi, jakija ich prymali, užyvali mienš ałkaholu i radziej traplali ŭ balnicu pa pryčynach, źviazanych z praźmiernym užyvańniem ałkaholu, čym ich ravieśniki, jakija nie vykarystoŭvali hetyja preparaty.
Aŭtary adznačajuć, što efiektyŭnaść preparataŭ ź siemahłutydam ci lirahłutydam akazałasia vyšejšaj, čym u standartnych lekaŭ, śpiecyjalna pryznačanych dla lačeńnia ałkaholnaj zaležnaści.
Tak, siarod 4321 čałavieka, jaki vykarystoŭvaŭ GLP-1 preparaty, jakija źmiaščajuć siemahłutyd, tolki 222 čałavieka (5%) byli špitalizavany pa pryčynach, źviazanym z užyvańniem ałkaholu. Heta značna mienš, čym u tych, chto prymaŭ admysłovyja leki dla lačeńnia zaležnaści. Tam takich vypadkaŭ było 40%.
Jak piša Forbes, vyniki inšaha daśledavańnia, apublikavanyja ŭ časopisie Addiction, pakazali, što
ŭ pacyjentaŭ z ałkaholnaj zaležnaściu, jakija prymali preparaty kłasa GLP-1, epizody zapojnaha pjanstva adbyvalisia na 50% radziej, čym u inšych udzielnikaŭ. Akramia taho, u ludziej z apijoidnaj zaležnaściu vierahodnaść pieradaziroŭki źniziłasia na 40%.
Navukoŭcy miarkujuć, što taki efiekt GLP-1-preparataŭ možna patłumačyć ich upłyvam na vobłaści mozhu, źviazanyja z vypracoŭkaj dafaminu. GLP-1 źnižaje vypracoŭku hetaha «harmonu zadavalnieńnia», što pryvodzić da asłableńnia adyktyŭnych pavodzin.
Aŭtary papiaredžvajuć, što atrymanyja vyniki nieabchodna interpretavać z aściarožnaściu. Dla taho, kab havaryć z upeŭnienaściu, patrebny dadatkovyja kliničnyja vyprabavańni.
Papularnyja preparaty Ozempic i Wegovy spravakavali zusim niečakany efiekt u žančyn
Na čornym rynku źjaviŭsia padrobleny Ozempic — vielmi niebiaśpiečny dla zdaroŭja
U ZŠA farmaceŭtyčnyja kampanii zapłaciać sotni miljonaŭ štrafaŭ za prodaž preparataŭ, jakija rabili ludziej narkamanami
7 mocnych mifaŭ pra ałkahol
Dacki farmhihant zachoplivaje śviet lekami ad atłuścieńnia, ale ekanomika Danii pad pahrozaj. Jak tak?
Kamientary