Jak minimum 14 čałaviek zatrymanyja za palityku ŭ rabočym pasiołku Jalizava

Adnosna taho, kolki čałaviek schapili ŭ pasiołku škłozavoda, infarmacyja razychodzicca, ale nazyvajecca ličba jak minimum 14 čałaviek.

U ludziej šukali padpiski na «ekstremisckija» resursy. 

Častka ludziej zastajecca pad vartaj, jak minimum dźviuch žančyn adpuścili da suda. 

U Jalizavie nikoli nie było ani arhanizavanych struktur apazicyi, ani niezaležnych hramadskich arhanizacyj, u pasiołku žyvie vobmal intelihiencyi. Heta typovy rabočy pasiołak Uschodniaj Biełarusi. Tut nikoli nie było značnaj pratestavaj aktyŭnaści, ale ŭ 2020-m i tut ludzi ŭstali łancuhom uzdoŭž šašy, pratestujučy suprać falsifikacyi vybaraŭ i pryciaśnieńnia narodu.

Nie vyklučana, što ŭ epicentrach pratestu 2020-ha pracent zatrymanych u ramkach pieradvybarčaj śpiecapieracyi moža być jašče bolšy, čym u Jalizavie.

Apošnimi dniami infarmacyja pra abłavy i zatrymańni prychodzić z roznych rehijonaŭ krainy. U «Našaj Nivy» jość infarmacyja pra šmatlikija zatrymańni 31 kastryčnika ŭ Minsku, Baraŭlanach i Homieli, pravaabaroncy paviedamlali taksama pra pieratrusy ŭ Smarhoni i Vaŭkavysku. Raniej nadychodziła infarmacyja pra chapuny pa čarzie ŭ rajonach Minskaj vobłaści, a taksama ŭ Hrodnie. Treba mierkavać, što chvala zatrymańniaŭ kocicca z adnaho kanca krainy ŭ druhi.

Stała viadoma, što supracoŭniki KDB z roznych haradoŭ uziali na ŭzbrajeńnie novuju stratehiju — pierad samym zatrymańniem u čałavieka adklučajuć mabilnuju suviaź praz apieratara.

Tamu, kali mabilnaja suviaź rezka źnikła i niama dostupu da sietki — to ź vialikaj dolaj imaviernaści ŭ bližejšyja chviliny da čałavieka mohuć pryjści siłaviki.

Raniej «Našaj Nivie» stała viadoma, što pierad siłavikami pastaŭlenaja zadača «prafiłaktavać» usich, chto moža pratestavać pierad vybarami ci ŭ čas hałasavańnia.

Składzienyja śpisy tych, chto padlahaje previentyŭnym vobšukam i zatrymańniam, tak zvanyja «pieršy i druhi śpisy». U «pieršy śpis» uvachodziać usie tyja, chto raniej byŭ asudžany pa administracyjnych ci kryminalnych artykułach. U «druhi śpis» uvachodziać ludzi, jakija raniej nie pryciahvalisia da adkaznaści pa palityčnych matyvach, ale jakija ličacca patencyjna niełajalnymi, palityčna aktyŭnymi.

Prychody da ludziej ź pieršaha śpisu mieli pačacca ŭžo ŭvosień — i sapraŭdy pačalisia. Adnak najbolš intensiŭnyja represii zapłanavanyja na śniežań—studzień — bližej da dnia hałasavańnia. «Kab nichto i nie pisknuŭ pierad vybarami», — cytuje prysutny na adnoj ź pieradvybarčych narad u rehijonach.

«Kali ŭ čałavieka ŭ telefonie niama padpisak — padpisać. Kali treba — prynieści ściah i sfatahrafavać u kvatery», — cytuje atrymanyja ŭkazańni inšy čałaviek.

Akramia taho, pierad vybarami maje adbycca «adpracoŭka pradpryjemstvaŭ» — heta značyć, demanstratyŭnaja pravierka telefonaŭ i zatrymańni na pracoŭnych miescach. Miarkujučy pa našaj infarmacyi, śpis takich ustanoŭ i zavodaŭ užo vyznačany.

Zadača siłavikoŭ — kab vybary prajšli «biez najmienšych incydentaŭ», heta značyć, kab nichto navat nie sprabavaŭ vyviesić pratestavyja ŭlotki, zapatrabavać prazrystaha padliku hałasoŭ ci publična vystupić suprać kandydatury Alaksandra Łukašenki.

Kali vy viedajecie pra toje, što zdaryłasia, bolš, pišycie redaktaru «Našaj Nivy» ŭ TH ci na [email protected]. Abo lubomu redaktaru ci žurnalistu «Našaj Nivy», jakoha viedajecie asabista. Važna kab śviet viedaŭ pra toje, što vyrablajuć ź biełarusami.

Masavyja palityčnyja represii ŭ Biełarusi praciahvajucca z 2020 hoda. Tady Alaksandr Łukašenka prajhraŭ Śviatłanie Cichanoŭskaj, ale nie addaŭ uładu.

Pa słovach hienieralnaha prakurora Andreja Švieda, tolki da kastryčnika 2023 hoda było zaviedziena bolš za 16 tysiač kryminalnych spraŭ «ekstremisckaj skiravanaści», heta značyć, palityčnaha charaktaru. Za apošni hod byli zaviedzienyja dadatkova jašče tysiačy kryminalnych spraŭ.

Zhodna ź infarmacyjaj Paŭła Łatuški, pradstaŭnika Abjadnanaha pierachodnaha kabinieta, z 2020 hoda represii zakranuli 136 tysiač čałaviek. Niekalki socień tysiač biełarusaŭ vymušanyja byli pakinuć krainu.

• 1
• 1
• 1
• 5
• 2
• 0
• 23
• 0