U Varšavie płanujuć pravieści Vialiki biełaruski dziciačy fest

— Siarhiej, najpierš zapytaju pra ŭłasna Dom tvorcaŭ. U žniŭni fundacyja źviartałasia pa dapamohu da biełaruskaj hramady ŭ suviazi z pahrozaj isnavańniu Domu. Jak spravy ciapier?

— Ja b skazaŭ, što ŭžo bolš pazityŭna raźvivajecca situacyja. My amal naźbirali na isnavańnie Doma tvorcaŭ da kanca hetaha hoda. Padklučyłasia vielmi šmat roznych ludziej, i znajomych, i zusim nie znajomych. Chutka budziem rabić post padziaki ŭsim, chto dapamoh. Dom budzie žyć.

— Što za dziciačy fiestyval płanujecie na 1 śniežnia?

— Siamiejny fest, vialiki biełaruski fiestyval dziacinstva i knihi. Uvohule ideja dziciačaha festu daŭno była pobač, ale ci času nie było, ci nie padychodziła niešta, nie spryjała arhanizacyi i praviadzieńniu. I voś užo ŭ Varšavie ja paznajomiŭsia z kalektyvam «Puhavicy», potym siudy ž pryjechaŭ naš znakamity Malavanyč. Padumali ŭtroch: a davajcie-ka zładzim sapraŭdny dziciačy fest, śviata. U mianie samoha dačka raście, i chočacca takoha voś admysłovaha dziciačaha. Mnie zdajecca, takich bujnych fiestyvalaŭ dla biełaruskich dziaciej u Varšavie jašče nie było. Tematyka dziciačaja nie tak raskručanaja, jak inšyja.

Šmat, kaniečnie, roznych festaŭ adbyvajecca, ale voś kab kankretna dziciačy, siamiejny fiestyval — takoha niejak i nie ŭzhadaju adrazu. Dy kab jašče i biełaruskaha kirunku.

Spačatku my zamachnulisia na supiervialiki miehafiestyval. Letam jašče zadumali, a potym stała zrazumieła, što składana budzie ź placoŭkaj — kali leta prajšło, kali heta možna było na vulicy zrabić. Zaraz tolki ŭ pamiaškańni.

— Fest budzie biaspłatnym?

— Płanujem, što tak, kali atrymajecca ŭ nas sabrać na «Hroncy». Padličyli, što nam spatrebicca na fest 4500 jeŭra. Hałoŭnaje, nam važna zrazumieć, ci sapraŭdy biełarusam heta cikava, ci hatovyja jany dałučycca. My ŭ svaju čarhu ŭsich zaprašajem dałučycca. I ŭdzielnikaŭ taksama, tamu možna nam pisać svaje prapanovy pa vystupach, numarach i h. d.

Taksama raźlik jość, kaniečnie, na sponsarskuju padtrymku praz nabyćcio łotaŭ. Łoty jość roznyja: vy achviarujecie peŭnuju sumu i padčas fiestyvalu atrymlivajecie kłasny padarunak, heta moža być i vaš ułasny vystup na scenie, ci, naprykład, dla vas budzie śpiecyjalny vystup peŭnaha kalektyvu. Možna atrymać kaladny łot, kali ŭžo na kaladnyja śviaty my pryjdziem pavinšavać vas ź Miadźviedziem, z Kazoj. Možna sabie zrabić niejki padarunak i padtrymać dobruju spravu — biełaruski dziciačy fiestyval.

— Prahrama festu ŭžo hatovaja?

— Dumajem zrabić roznyja sceny: tam budzie teatralnaja častka, adukacyjnaja, muzyčnaja i, kaniečnie, knižnaja. Tamu što ŭsio, mabyć, vakoł hetaha na fiestyvali dziciačaj knižki i ahułam fiestyvali dziaciej. Užo my źviazvalisia z roznymi vydaŭcami i aŭtarami biełaruskich dziciačych knih, jakija vychodzili ŭ hetym hodzie. Usich chočam zaprasić, kab była i sustreča ź imi, i možna było kupić knižki. I, kaniečnie, budzie naš dziciačy śpieŭnik, jaki vyjšaŭ u hetym hodzie, ale jašče nie byŭ pradstaŭleny admysłova, jaskrava. Chaciełasia b raskazać pra hetaje cikavaje vydańnie, bo hetamu ž śpieŭniku ŭžo amal sto hadoŭ.

Nu i, kaniečnie, budziem staracca, kab na feście było šmat usiaho pazityŭnaha: i rostavyja lalki, i niejkija siurpryzy, interaktyŭ dla dziaciej. Upeŭnieny, što hurt «Puhavicy» z hetym vielmi dobra spravicca.

— Niekalki imionaŭ udzielnikaŭ festu možna nazvać užo?

— Nie chočacca ŭsie karty raskryvać, tym bolš jašče šmat pieramovaŭ. Budziem hladzieć ad mahčymaściaŭ. Viadoma, što chaciełasia b pabačyć i teatralnyja kalektyvy ź Biełastoka, Krakava sa śpiektaklami dla dziaciej. Budziem zaprašać roznych animataraŭ, kab aktyŭna fest išoŭ, kab uvieś čas niejkija majstar-kłasy, zaniatki i h. d.

My zaraz viadziem pieramovy z usimi, chto ŭ pryncypie štości robić dla dziaciej ci ź dziećmi biełaruskaje. Pakul razhladajem tych, chto mieścicca ŭ Polščy, usich, chto robić niešta dla dziaciej.

Budziem rady, kali niechta vyjdzie da nas z prapanovaj svajho čahości cikavaha. My z radaściu ŭklučym usich, chto žadaje pakazać svajo, chto štości robić ad dušy i prafiesijna.

Chacieli voś taksama Bieńku zaprasić ź Bierlina ź jaje dziciačym śpiektaklem. Ale, zrazumieła, usio zaležyć ad našaha zboru na fest.

Moža być, jakoj arhanizacyi ci inicyjatyvie budzie cikava ŭvajści ŭ historyju pieršaha biełaruskaha dziciačaha fiestyvalu ŭ Varšavie, to my pry ŭmovie dapamohi hatovy raźmiaścić łahatypy padčas festu, uzhadvać na našych admysłovych staronkach i tak dalej.

Što da miesca festu, to viadziem pieramovy ź niekatorymi placoŭkami, heta zaraz jakraz budzie vyrašacca. Vybirajem ź niekalkich mahčymych varyjantaŭ, dzie adbudziecca fest.

• 0
• 0
• 1
• 0
• 0
• 0
• 0
• 0