«Ja jeŭ vielizarnyja sendvičy z krevietkami za adnym stałom z KDB». Stołtenbierh raspavioŭ, jak u 1991 hodzie sprabavaŭ zavierbavać savieckaha ahienta

Stołtenbierh kantaktavaŭ z KDB u Osła ŭ 1980-ch hadach, kali ŭznačalvaŭ Lihu rabočaj moładzi — moładzievuju arhanizacyju Rabočaj partyi Narviehii. «Heta było vielmi dziŭna. Baćka kazaŭ mnie, što adzinyja, z kim treba razmaŭlać u rasijskaj ambasadzie, — heta chłopcy z KDB, bo tolki jany majuć niejki ŭpłyŭ», — raspavioŭ Stołtenbierh.

«Ja nikoli nie rabiŭ ničoha takoha, za što mnie było b soramna. I ŭsio ž jany zaprasili mianie na abied. I ja jeŭ vielizarnyja sendvičy z krevietkami za adnym i tym ža stałom u adnym i tym ža restaranie ŭ Osła, prykładna raz u miesiac, z chłopcam pa proźviščy Kiryłaŭ. I jon byŭ z KDB. Biez sumnievu».

Były hienieralny sakratar NATO paviedamiŭ, što jahony baćka, jaki byŭ znajomy ź Viktaram Hruško, ahientam KDB pad dypłamatyčnym prykryćciom u Narviehii, raiŭ, kab syn uzhadniaŭ kožnuju takuju sustreču z narviežskimi śpiecsłužbami.

U 1991 hodzie Narviežskaja kontrraźviedka pryjšła da mianie i skazała: «Nie mahli b vy dapamahčy nam pierakanać Kiryłava stać pierabiežčykam?» Ja viedaŭ hetaha chłopca 10 hadoŭ. Padčas apošniaha abiedu ja skazaŭ: «Ja ciabie viedaju, Ty mianie viedaješ, kali chočaš saskočyć, źviartajsia: Narviehija — vydatnaja kraina. Jany pra ciabie pakłapociacca»».

Kiryłaŭ nie pryniaŭ prapanovu. Paźniej Stołtenbierh daviedaŭsia z adkrytych archivaŭ KDB, što savieckaja raźviedka prysvoiła jamu kodavaje imia «Ściakłoŭ».

Narviežski telekanał NRK paviedamiŭ u 2000 hodzie, što ahient KDB Barys Kiryłaŭ, jaki pracavaŭ u Narviehii pad dypłamatyčnym prykryćciom, u 1991 hodzie sprabavaŭ zavierbavać Jensa Stołtenbierha.

Pavodle źviestak narviežskich miedyja, Stołtenbierh trapiŭ u pole zroku KDB u 1989 hodzie i jamu dali mianušku «Ściakłoŭ». Asabistaj spravie Stołtenbierha ŭ KDB prysvoili hrafu SAR (sprava apieratyŭnaj raspracoŭki»). «Takija daśje zvyčajna pryznačalisia dla ludziej, jakija znachodzilisia na «prasunutaj stadyi raźvićcia» ci ŭžo ličylisia adnym z «kanfidencyjnych kantaktaŭ» KDB», — paviedamlaŭ NRK.

Pra toje, što Kiryłaŭ sprabavaŭ zavierbavać Stołtenbierha, paviedamiŭ uciakač na zachad ahient KDB Michaił Butkoŭ, jaki raskryŭ sietku KDB u Narviehii. Paśla vykryvalnych zajaŭ Butkova niekalki savieckich dypłamataŭ, u tym liku Kiryłava, vysłali z Narviehii za «dziejnaść, nie sumiaščalnuju z dypłamatyčnym statusam».

Pradstaŭnica Słužby zamiežnaj raźviedki Rasii Taćciana Samolis u kastryčniku 2000 hoda admoviłasia kamientavać paviedamleńni pra toje, što KDB sprabavała zavierbavać Stołtenberha (u toj momant jon uznačalvaŭ urad Narviehii). «Pa tradycyi, jakaja skłałasia ŭ śpiecsłužbach usich krain, my nie kamientujem dačynieńnie abo niedatyčnaść toj ci inšaj asoby da svajho viedamstva», — kazała Samolis.

Jens Stołtenbierh 1 kastryčnika 2024 hoda pakinuŭ pasadu hienieralnaha sakratara NATO, jaki zajmaŭ z 2014 hoda. Jaho źmianiŭ Mark Rute — były premjer-ministr Niderłandaŭ.

• 1
• 0
• 1
• 0
• 1
• 0
• 0
• 0