MZS Litvy zajaviła, što nie atrymlivała ad Minska prapanoŭ pa narmalizacyi adnosin. I nazvała niekalki ŭmoŭ
Ministerstva zamiežnych spraŭ Litvy adkazała na artykuł Maksima Ryžankova ŭ haziecie Administracyi Łukašenki.
MZS Litvy zajaviła, što nie atrymała ad Minska nijakich prapanoŭ ab narmalizacyi stasunkaŭ.
U artykule dla «Biełaruś siońnia» kiraŭnik biełaruskaha MZS zaklikaŭ Litvu adnavić supracoŭnictva pa linii pahraničnych i śpiecyjalnych słužbaŭ, halinovych viedamstvaŭ, ministerstvaŭ zamiežnych spraŭ.
«Ministerstva zamiežnych spraŭ Litvy nie atrymlivała pa dypłamatyčnych kanałach prapanovy biełaruskaha boku, pra jakija havorycca ŭ artykule, apublikavanym ministram zamiežnych spraŭ Biełarusi», — cytuje paviedamleńnie MZS Litvy LRT.
U viedamstvie padkreślili, što ŭ Biełarusi praciahvajucca palityčnyja represii, kraina praciahvaje padtrymlivać Rasiju ŭ vajnie suprać Ukrainy, a taksama viadzie infarmacyjnuju vajnu suprać jeŭrapiejskich susiedziaŭ.
MZS Litvy nazvaŭ niekalki ŭmoŭ dla narmalizacyi adnosin.
«Režym Łukašenki vydatna viedaje, pry jakich umovach možna čakać adnaŭleńnia adnosin pamiž Litvoj i Biełaruśsiu, jakija pavalilisia pa vinie režymu: vyzvalić usich palitviaźniaŭ, vypłacić kampiensacyju im i ŭsim biełarusam, jakija paciarpieli ad pieraśledu, pryciahnuć da adkaznaści vinavatych u hvałcie i złačynstvach — nie tolki niepasrednych vykanaŭcaŭ, ale i asob, jakija addavali zahady», — havorycca ŭ paviedamleńni.
Siarod inšych umoŭ — praviadzieńnie svabodnych vybaraŭ u Biełarusi, adnaŭleńnie spraviadlivaści dla biełaruskaha naroda, a taksama dla naroda Ukrainy, jaki paciarpieŭ ad rasiejskaj ahresii. Litva, akramia taho, patrabuje pakarać vinavatych u złačynstvach suprać čałaviectva, u tym liku ŭ niezakonnych pierasoŭvańniach ukrainskich dziaciej, a taksama kampiensavać straty, jakija paniesła Litva praz hibrydnuju ahresiju Biełarusi.
U MZS Litvy zajavili, što majuć namier damahacca dalejšaj izalacyi Biełarusi i ŭviadzieńnia novych sankcyj.
Chrysta Hrozieŭ: ad ramantyka-radyjoamatara da čałavieka, jaki vykryŭ samyja zmročnyja tajamnicy HRU i FSB. Jak jaho vierbavała śpiecsłužba Luksiemburha i jak jon vymušany chavacca ciapier
Kamientary