Miarkujecca, što hetyja srodki buduć nakiravanyja ŭkrainskim uładam za košt adsotkaŭ ad aktyvaŭ Rasii, zamarožanych u Jeŭrasajuzie, piša Bi-bi-si.
«Bieśpierapynnyja rasijskija ataki aznačajuć, što Ukrainie patrebnaja pastajannaja padtrymka ES. Jeŭrakamisija daść Ukrainie kredyt u pamiery da 35 młrd jeŭra ŭ ramkach abaviazacielstvaŭ Vialikaj siamiorki. Heta čarhovy vialiki ŭkład ES u adnaŭleńnie Ukrainy», — napisała fon der Lajen u sietcy Ch.
U piatnicu kiraŭnik Jeŭrakamisii znachodzicca ź vizitam u stalicy Ukrainy, dzie pravodzić pieramovy z prezidentam Uładzimiram Zialenskim.
U červieni krainy Vialikaj siamiorki ŭchvalili miechanizm, pavodle jakoha Ukraina pavinna atrymać kredyt 50 młrd dalaraŭ: jon pavinien vypłačvacca z budučych adsotkaŭ z zamarožanych rasiejskich aktyvaŭ.
Jeŭrakamisija paviedamlaje, što hetyja srodki buduć vykarystanyja dla finansavańnia ŭkrainskaha dziaržaŭnaha biudžetu, patreby jakoha značna vyraśli praz rasijskuju ahresiju.
Krainy G7 — Kanada, Francyja, Hiermanija, Italija, Japonija, Vialikabrytanija i ZŠA — źjaŭlajucca najvažniejšymi finansavymi i vajennymi prychilnikami Ukrainy z momantu poŭnamaštabnaha ŭvarvańnia Rasii ŭ 2022 hodzie.
Suma rasijskich aktyvaŭ, zamarožanych hetymi dziaržavami i Jeŭrapiejskim Sajuzam, składaje 325 młrd dalaraŭ.
Pradstaŭniki zachodnich krain padkreślivali, što ab kanfiskacyi rasiejskich aktyvaŭ havorka nie idzie, a Ukraina atrymaje tolki adsotki ad ich.
Pa danych haziety Financial Times, pieršapačatkova płanavałasia, što dola kožnaha z členaŭ «siamiorki» pry vydzialeńni Ukrainie 50 młrd dalaraŭ budzie adpaviadać ich ekanamičnaj mocy. Takim čynam ZŠA i ES pavinny byli nakiravać Kijevu pa 20 młrd dalaraŭ, a astatniaje — Kanada, Japonija i Vialikabrytanija.
Kamientary