Łatuška — Łukašenku: Ja hatovy ŭdzielničać u vybarach-2025, ale ty — bajaźliviec i šuler

Łukašenka siońnia zajaviŭ: «Ja prosta chaču, jak zaŭsiody, im paraić: kali jany chočuć pieraviarnuć krainu i ŭdzielničać u prezidenckich vybarach, dakazvać svaju racyju ci jašče niešta, im treba prychodzić i zmahacca na prezidenckich vybarach». U svaim manałohu ty ŭspomniŭ mianie. I ja chaču tabie adkazać».

«Ja hatovy ŭziać udzieł u vybarach na pasadu prezidenta Biełarusi ŭ 2025 hodzie. Ja hatovy ŭziać udzieł u prezidenckich vybarach i raskazać biełarusam chto ty, što ty ź siabie ŭjaŭlaješ. Ja hatovy raskazać pra toje, što ź siabie ŭjaŭlajuć demakratyčnyja siły, što ŭjaŭlaje ź siabie demakratyja.

Adnak u mianie jość umovy, jakija ty pavinien vykanać: spynić represii ŭ krainie i vyzvalić byłych kandydataŭ na pasadu prezidenta Biełarusi, a taksama ŭsich palityčnych źniavolenych, jakich ty katuješ u svaich turmach», — kaža Pavieł Łatuška.

«Ja hatovy ŭziać udzieł u vybarach, kali ty spyniš kryminalnyja spravy ŭ dačynieńni da ŭsich biełarusaŭ, jakija viali baraćbu za demakratyju i svabodu ŭ našaj krainie hetyja čatyry hady, kali ty admieniš usie palityka-matyvavanyja prysudy, vyniesienyja ŭ dačynieńni da biełarusaŭ. I sankcyi za ŭsio heta buduć admienienyja.

Ja hatovy ŭziać udzieł u vybarach prezidenta ŭ 2025 hodzie, kali ty zabiaśpiečyš mižnarodnaje nazirańnie. Kali mižnarodnyja naziralniki razam ź niezaležnymi ŭnutranymi naziralnikami buduć na kožnym vybarčym učastku padčas vybaraŭ. 

Ja hatovy, ale ty — bajaźliviec.

Z usiaho taho, što ja pieraličyŭ, ty nie zrobiš ničoha. Tamu što addaješ sabie vyrazna spravazdaču ŭ tym, što nia maješ padtrymki ŭ biełaruskim hramadztvie. Ja vyjhraju ŭ ciabie, Łukašenka, navat znachodziačysia za miažoj, kali ty zarehistruješ mianie kandydatam i zabiaśpiečyš niezaležnaje nazirańnie za padlikam hałasoŭ. Vyjhraju nie ja-Pavieł Łatuška, vyjhraje biełaruski narod. 

Ja ŭpeŭnieny, što siarod biełaruskich palitykaŭ šmat tych, chto hatovy kinuć tabie vyklik i pieramahčy ciabie.

Ale ty ž nie dapuściš da vybaraŭ nikoha, akramia svaich chałujoŭ, bo ty — šuler. 

Biełaruski narod nikoli nie abiare ciabie, bo biełarusy ciabie nienavidziać. Ty bajaźliviec, chłus i zabojca. Adzinaje, u čym ty nie schłusiŭ, choć sam, viadoma, ličyš inakš — u biełarusaŭ budzie novy prezident», — reziumavaŭ namieśnik staršyni Abjadnanaha pierachodnaha kabinieta.

• 118
• 0
• 11
• 3
• 0
• 1
• 1
• 2