Jaho płošča pryblizna składaje kala 70 ha. Uzharańnie vialikaje, asnoŭnaja častka jaho — na bałocie.
Tušeńnie pažaru na Almanskich bałotach płanujecca zaviaršyć da viečara. Pra heta žurnalistam raspavioŭ ministr lasnoj haspadarki Alaksandr Kulik, kamientujučy pažar u Paleskim lashasie (Stolinski rajon), jaki druhi dzień tušać rabotniki lasnoj achovy i MNS, piša BiełTA.
Uviečary 9 vieraśnia pačaŭsia bujny lasny pažar na terytoryi Rubielskaha laśnictva Paleskaha lashasa, na Almanskich bałotach.
«Jaho płošča pryblizna składaje kala 70 ha. Uzharańnie vialikaje, asnoŭnaja častka jaho — na bałocie. Lasnyja ziemli my pakul adstojvajem, — raspavioŭ Alaksandr Kulik. — Na žal, niekatoryja ŭčastki, dzie jość bahun, nizkabanitetnaja chvoja, nie dali nam padstupicca minułaj nočču. Ale, dumaju, što siońnia da viečara my hetyja raboty zavieršym. Samaje hałoŭnaje, kab u dalejšym naša nasielnictva adkazna staviłasia da takich mierapryjemstvaŭ — jość časovyja abmiežavańni, treba ich vykonvać».
Na pažary zadziejničany 110 čałaviek i vosiem pažarnych mašyn. Asnoŭnaja technika — heta husieničnyja bałotachody, jakija najbolš efiektyŭnyja. Dla ludziej arhanizavany načleh, charčavańnie — usie ŭmovy zabiaśpiečany.
Sumiesna z MNS było pryniata rašeńnie ab pryciahnieńni avijacyi — heta dva viertaloty avijacyi MNS (Mi-8 i Mi-17), a taksama na hatoŭnaści staić Mi-26.
«Asnoŭnaja častka pažaru łakalizavanaja, — adznačyŭ ministr. — My na pastajannaj suviazi. Pry nieabchodnaści dalejšaha ŭzmacnieńnia technikaj abo ludźmi dapamoha budzie nieadkładna nakiravanaja», — padkreśliŭ jon.
Kamientary