48-hadovaha ajcišnika z Mahilova sudziać za danaty na dapamohu Ukrainie
Alaksiej Leskaviec moža atrymać da 10 hadoŭ kałonii.
Alaksieju Leskaŭcu 48 hadoŭ. Pa źviestkach prajekta DIT, jon z Mahilova.
Alaksiej — prahramist. Ź viadomych miescaŭ pracy mužčyny tolki dziaržaŭnyja pradpryjemstvy. Jon pracavaŭ na Mahiloŭskim mietałurhičnym zavodzie i administravaŭ sajt kampanii, u Prajektnym śpiecyjalizavanym biuro, inžynieram-prahramistam u Centry haradskich infarmacyjnych sistemaŭ Mahilova.
Chobi mužčyny — fatahrafija. Jon fatahrafuje jak na stužku, hetak i na ličbavyja fotaaparaty. Alaksiej rehularna zdymaje roznyja haradskija mierapryjemstvy i dzielicca fota ŭ sacsietkach. Lubić jon i padarožničać, jak pa Biełarusi, hetak i pa zamiežžy.
Sud nad Leskaŭcom pačniecca 22 žniŭnia ŭ Mahiloŭskim abłasnym sudzie. Sudzić jaho budzie Vasil Hałkoŭski, jaki maje na rachunku «ścipłyja» šeść prysudaŭ pa palityčnych spravach.
Leskaŭca abvinavačvajuć pa dvuch artykułach — «finansavańnie abo inšaje materyjalnaje zabieśpiačeńnie vajny» (č. 2 art. 361-3 KK) i «finansavańnie ekstremisckaha farmiravańnia» (art. 361-2 KK, straciŭ moc u mai 2021).
Alaksieju pahražaje da 10 hadoŭ kałonii. Akaličnaści spravy nieviadomyja.
«Naša Niva» — bastyjon biełaruščyny
PADTRYMAĆ
Kamientary