Łukašenka źmiakčaje antynarkatyčnaje zakanadaŭstva. Kolki čałaviek vyjdzie na svabodu?

Jak karajuć za narkotyki ciapier?

Pa źviestkach inicyjatyvy Legalize Belarus, u apošnija hady ŭ Biełarusi štohod vynosiać ad 2 da 3 tysiačaŭ prysudaŭ pa antynarkatyčnych artykułach KK.

Z 2016-ha, kali stała dastupnaja statystyka pa artykule 328, pa im asudzili 19307 čałaviek. Ź ich 67% — spažyŭcy narkotykaŭ (č. 1 art. 328), a 29% raspaŭsiudžvali ich z metaj zarabić (č. 3, č. 4 i č. 5 art. 328).

Što źmienicca ŭ antynarkatyčnym zakanadaŭstvie?

Administracyja Łukašenki pieradała ŭ parłamient zakonaprajekt «Ab źmianieńni kodeksaŭ pa pytańniach kryminalnaj adkaznaści». Jon praduhledžvaje šmat źmianieńniaŭ, ale samyja značnyja tyčacca antynarkatyčnych artykułaŭ.

Prapanavanyja novaŭviadzieńni:

• pa 1-j častcy artykuła 328 možna budzie atrymać aryšt terminam try miesiacy (ciapier praduhledžvajecca da piaci hadoŭ «chimii» abo ad dvuch da piaci hadoŭ kałonii).
• Pa 2-j častcy artykuła za «razavyja vypadki zbytu narkotykaŭ», pa jakoj zvyčajna sudziać tych, chto prosta padzialiŭsia narkotykami ź siabrami, možna budzie atrymać chimiju (ciapier — ad troch da vaśmi hadoŭ kałonii). 
• pa 4-j častcy, «prodaž narkotykaŭ arhanizavanaj hrupaj», nižni paroh pakarańnia źnižajecca z 10 da 8 hadoŭ.

Tearetyčna ŭ parłamiencie mohuć paśla abmierkavańnia skarektavać dakumient. Ale z ulikam taho, što deputaty ŭ realnaści byli pryznačanyja na svaje pasady paśla ŭzhadnieńnia z Administracyjaj Łukašenki, było b dziŭna čakać ad ich niejkaha piarečańnia.

Ci buduć pierahladać staryja prysudy?

My zapytalisia ŭ byłoj advakatki, a ciapier jurystki Free Belarus Center Alviny Minhazavaj pra toje, ci budzie datyčycca palohka tym, chto ŭžo za kratami:

«Kali sankcyja artykuła źmianšajecca, to prysudy mohuć być pierahledžanyja. I takaja praktyka ŭžo była ŭ Biełarusi ŭ 2019 hodzie.

Tady byli źnižanyja nižnija parohi pa častkach 2 i 3 artykułu 328. I paśla hetaha prysudy pierahladalisia.

Naprykład, kali pa častcy 2 asudžanamu prysudzili 5 hadoŭ pazbaŭleńnia voli, to paśla pierahladu termin źnižaŭsia da troch. Pierahlad rabiŭ sud, jaki ŭ svoj čas vynosiŭ prysud, abo sud pa miescy adbyćcia pakarańnia — pa zajavie asudžanaha, ci dakładzie orhana, jaki kiruje vykanańniem pakarańnia, ci naziralnaj kamisii.

U tot pieryjad u kałonijach administracyja masava davała padpisvać zajavy na pierahlad, jakija paśla nakiroŭvalisia ŭ sudy. Mahčyma, identyčny paradak budzie i hetym razam».

Terminy źniziać usim asudžanym pa č.4 artykuła 328?

Pakul niezrazumieła. U anałahičnaj situacyi ŭ 2019 hodzie terminy pierahladali amal usim. Bolšaści termin źmianšaŭsia na dva hady. 

«U žanočaj kałonii źnizili ŭsim, u mužčynskich — amal usim. Ale niekatorym źnizili nie na dva hady, a na hod ci paŭtara. Apošniaje słova za sudom, i čamu prymałasia toje ci inšaja rašeńnie, niezrazumieła», — raskazvaje byłaja źniavolenaja, jakaja bačyła praces na ŭłasnyja vočy.

Jakoj kolkaści ludziej mohuć pierahladzieć prysudy?

Ciažka skazać, ale možna pasprabavać padličyć.

Z 2016 pa 2024 hady kala 9000 čałaviek asudzili da pazbaŭleńnia voli pa artykule 328. Častka ź ich užo vyjšła, ale za kratami amal usie z 1500 asudžanych pa 4 častcy artykuła. Pryčym bum kryminalnych spraŭ pa «raspaŭsiudzie arhanizavanaj hrupaj» adbyŭsia ŭ 2022-2023 hadach, kali asudzili kala 1000 čałaviek. Navat kali im i skinuć pa 2 hady, to na volu jany nie vyjduć, bo adsiedzieli zanadta mała.

Tamu havorka, imavierna, pojdzie pra vyzvaleńnie niekalkich dziasiatkaŭ ludziej, jakija byli asudžanyja daŭno — jašče ŭ siaredzinie 2010-ch.

• 3
• 1
• 0
• 1
• 0
• 0
• 1
• 0