Licej BDU ŭdakładniŭ: konkurs sioleta — 7,6 čałavieka na miesca. I jon vyras, a nie abvaliŭsia. Jak tak?

Na sajcie Liceja BDU źjaviłasia kančatkovaja infarmacyja pra vyniki ŭstupnych ispytaŭ. Adznačajecca, što konkurs skłaŭ 7,6 čałavieka na miesca (letaś — 7 čałaviek na miesca).

Ale ŭčora pa ŭsich ŚMI raźlaciełasia infarmacyja pra toje, što konkurs u Licej upaŭ u paŭtara raza — da 4,3 čałavieka na miesca. Jak tak atrymałasia?

Roźnica ŭ tym, pa jakoj mietadałohii ličyć konkurs. Kožny abituryjent moh padać zajavu na dva profili — pry ŭmovie, što adzin z ustupnych ekzamienaŭ budzie ahulnym. Niechta karystaŭsia takoj mahčymaściu, niechta ihnaravaŭ jaje.

Takim čynam, na 264 miescy pretendavali 1133 abituryjentaŭ, jakija pakinuli 1996 zajavaŭ. Kali ličyć konkurs pa ludziach, budzie nasamreč 4,3, kali ž pa zajavach — to 7,6.

Jość i treciaja mietodyka padliku konkursu, jaje vykarystoŭvali na sajcie Liceja BDU ŭ raniejšyja hady. Jość peŭnaja kolkaść abituryjentaŭ, jakija pastupajuć biez ekzamienu, bo pieramahli na respublikanskich alimpijadach pa profilnych pradmietach. Sioleta takich było 13 čałaviek. Aproč taho, 3 čałavieki atrymali rekamiendacyi ad Nacyjanalnaha dziciačaha technaparka i taksama nie zdavali ispyty. Takim čynam, 16 miescaŭ u Licei BDU nie trapili na konkurs. Značycca, možna ličyć, što 1980 zajavaŭ pretendavali na 248 svabodnych miescaŭ. U takim razie konkurs skłaŭ 7,9 (letaś pa hetaj mietodycy było 8,9)

***

Najbolšaja kolkaść dakumientaŭ sioleta pryniata na hramadaznaŭčy profil — 268. Konkurs tut składaje 12,2 čałavieka na miesca.

U matematyčny kłas zarehistravalisia 234 abituryjenty (konkurs — 10,6 čałavieka na miesca), bijałahičny — 224 (konkurs — 5,1), fizičny — 204 (konkurs — 9,3), chimičny — 184 (konkurs — 8,4), fiłałahičny — 164 (konkurs — 7,5).

Infarmatyka-matematyčny — 174 (konkurs — 7,9), historyka-hramadaznaŭčy — 163 (konkurs — 7,4), infarmatyka-fizičny — 80 (konkurs — 3,6), humanitarny — 75 (konkurs — 3,4), hieahrafičny — 27 (konkurs — 3,9).

Zaličeńnie ŭ 10 kłasy ažyćciaŭlałasia pa vynikach dvuch piśmovych ustupnych vyprabavańniaŭ.

Pry pastupleńni na hramadaznaŭčy profil sioleta nieabchodna było nabrać 103 bały sa 110 mahčymych, na fiłałahičny — 96,75, na historyka-hramadaznaŭčy — 95,5, na infarmatyka-matematyčny — 93,5, na ekanamičny — 93,5, na fizičny — 91, na matematyčny — 84,5, na humanitarny — 81,25, na chimičny — 76,7, na bijałahičny — 69,65, na hieahrafičny — 68,5, na infarmatyka-fizičny — 66.

Biez ustupnych vyprabavańniaŭ byli zaličany 13 pieramožcaŭ zaklučnaha etapu respublikanskaj alimpijady pa vučebnych pradmietach i try ŭładalniki rekamiendacyi nahladalnaj rady Nacyjanalnaha dziciačaha technaparka.

Usiaho ŭ hetym hodzie ŭ Licej imia F. E. Dziaržynskaha BDU ŭ 10 kłasy pryniata 264 navučencaŭ i sfarmiravana 12 kłasaŭ pa 22 čałavieki.

• 0
• 2
• 11
• 0
• 1
• 1
• 0
• 0