Premjeram stanie 61-hadovy Kir Starmier.
Apazicyjnaja Lejbarysckaja partyja pieramahaje na vybarach u Pałatu hramadaŭ Vialikabrytanii. Takija źviestki ekzitpołu, apublikavanaha Bi-bi-si paśla zakryćcia ŭčastkaŭ uviečary ŭ čaćvier, paviedamlaje Rasijskaja słužba Radyjo Svaboda.
Pavodle danych apytańnia na vychadzie z učastkaŭ, praviedzienaha kampanijaj Ipsos, lejbarysty mohuć atrymać 410 miescaŭ u Pałacie hramadaŭ z 650, to-bok absalutnuju bolšaść. Čakajecca, što ich lidar Kir Starmier sfarmuje ŭrad.
Kansiervatary paśla 14 hadoŭ va ŭładzie adpraviacca ŭ apazicyju. Ich vynik zhodna z ekzitpołam — 131 miesca, što niekalki bolš, čym pradkazvali pieradvybarnyja apytańni. Na trecim miescy libierał-demakraty, jany mohuć raźličvać na 61 mandat.
U parłamient prachodziać i prychilniki Najdžeła Faradža z pravapapulisckaj Partyi reformaŭ (13 mandataŭ). Značna pamienšycca pradstaŭnictva šatłandskich nacyjanalistaŭ — tolki 10 miescaŭ. 4 miescy atrymajuć valijskija nacyjanalisty, na dva moža pretendavać partyja Zialonych.
Pakolki vybary pravodziacca pa mažarytarnaj sistemie, i ŭ akruhach adryvy pamiž kandydatami mohuć być vielmi nievialikimi, kančatkovyja vyniki mohuć adroźnivacca ad danych ekzitpołu, adnak pieramoha lejbarystaŭ vyhladaje pradvyznačanaj.
Vyniki padliku hałasoŭ stanuć viadomyja da ranicy. Vierahodna, užo 5 lipienia premjer-ministr Ryšy Sunak, jaki staŭ premjeram u kastryčniku 2022 hoda, aficyjna padaść u adstaŭku.
Lejbarysty pravodzili kampaniju pad levacentrysckimi, adnosna pamiarkoŭnymi łozunhami (sam Starmier pradstaŭlaje centrysckaje kryło).
Jany zajaŭlajuć, što palityka Łondana ŭ dačynieńni da Ukrainy nie źmienicca — Brytanija praciahnie padtrymlivać hetuju krainu ŭ supraćstajańni z Rasijaj.
Lejbarysckaja (Rabočaja) partyja była stvorana ŭ 1900 hodzie, upieršyniu pryjšła da ŭłady roŭna sto hadoŭ tamu, u 1924 hodzie (urad Ramseja Makdonalda) i z taho času stała hałoŭnaj apazicyjnaj partyjaj Kansiervatyŭnaj partyi. Byli ŭrady Klemienta Etli, Haralda Vilsana, Džejmsa Kałahana, Toni Błera, apošni lejbaryscki ŭrad byŭ Hordana Brauna (2007—2010).
Ciapier čytajuć
Staŭ viadomy sens kryminalnaj «spravy strachaŭščykoŭ»10
Kamientary