Stała viadoma, što za žančyna-pravakatarka chadziła pa Breście z rasijskim ściaham z Z-simvolikaj
Chto ž taja fanatka vajny, jakaja hulała pa vulicach Bresta z rasijskim ściaham ź litaraj Z i praź jakuju jak minimum adzin čałaviek zatrymany? «Naša Niva» raskazvaje pra jaje asobu.
Heta Natalla Karobka, joj 51 hod. Zarehistravana žančyna ŭ Pružanach, ale žyvie, mierkavana, u pryvatnym domie ŭ Breście. Na jaho, darečy, Natalla paviesiła ściahi Biełarusi i SSSR. A ŭnutry chaty ŭ fanatki Łukašenki i Pucina visiać ich fotazdymki. Zrešty, tam amal što tematyčny muziej: jość i ściahi roznych pamieraŭ, i majki z cytatami Łukašenki. Kalekcyja suvieniraŭ sa spartyŭnych spabornictvaŭ susiedničaje z rečami z łahatypami vahnieraŭcaŭ.
Biez demanstracyi simvałaŭ vajny nie abychodzicca ŭ Natalli navat siamiejnaja viačera: smažyć šašłyki pad ałkahol žančyna chodzić u kiepcy ź litaraj Z.
Pa apošnich viadomych źviestkach, Natalla pracavała majstrycaj u TAA «Biełmarkietkampanija». Sacyjalna aktyŭnaj u sacyjalnych sietkach pačała być u 2020 hodzie, ale asabliva pačała staracca paśla pačatku vajny Rasii va Ukrainie.
Natalla vychodziła na akcyi z aficyjnym čyrvona-zialonym ściaham, udzielničała ŭ aŭtaprabiehach «Patryjotaŭ Biełarusi». Svajho syna taksama brała na prapahandysckija mierapryjemstvy. U minułym hodzie syn Natalli słužyŭ u biełaruskaj armii.
Natalla — aktyŭnaja ŭdzielnica roznych mierapryjemstvaŭ, jakija pryśviečany Vialikaj Ajčynnaj vajnie. Jana davoli časta chodzić na ich mienavita z rasijskim ściaham. Dałučajecca i da «Bieśśmiarotnaha połka».
Hod tamu, kali stała viadoma, što vahnieraŭcy stvorać łahier u Mahiloŭskaj vobłaści, Natalla zapisała videa ź ich ściaham i podpisam: «Sardečna zaprašajem u Biełaruś!».
Na svajoj staroncy ŭ tyktoku žančyna raspaŭsiudžvaje prapahandysckija roliki. Siarod jaje lubimych cheštehaŭ — #zabaćku i #pucinnašpriezidient, #pobiedabudietzanami. U adnym z rolikaŭ u tyktoku Natalla zaklikaje pastavić łajki tych, chto choča adnaŭleńnia SSSR — sabrała ažno 94 łajki.
Na staronku Natalli ŭ tyktoku padpisana bolš za 17 tysiač čałaviek. Mienavita tam jana źmiaściła rolik, jakim zacikavilisia siłaviki. «Idziom my pa Breście sa ściaham siabroŭskaj nam Rasii, i tut da nas adna niedabrastčanka jak daje…łasia», — padpisała videa Natalla.
Tym časam hubazikaŭcy pradkazalna vystupili na baku prarasijskich aktyvistaŭ. Jany paviedamili, što žančyna, jakaja vystupiła suprać prapahandy vajny na vulicach Bresta, «u toj ža dzień vyjechała z krainy ŭ Polšču», a «ŭ 2020 jana ŭ ekstremisckich čatach zaklikała da biesparadkaŭ».
A voś chłopca, jaki vypadkova staŭ śviedkam kanfliktu i krytyčna vykazaŭsia nakont rasijskaha ściaha ź litaraj Z, zatrymali. Siłaviki ŭžo zapisali videa ź im: chłopiec paprasiŭ prabačeńnia ŭ Natalli, rasijskaha naroda i «ŭdzielnikaŭ SVA».
Kamientary