U Jerevanie pratestoŭcy raźbili namiotavy łahier pierad parłamientam
U noč na 10 červienia ŭdzielniki šeścia na čale z archijepiskapam Bahratam Hałstanianam akružyli budynak parłamienta. Tam adbylisia łakalnyja sutyčki pamiž mitynhoŭcami i palicejskimi.
U Jerevanie prychilniki ruchu «Tavuš u imia Radzimy» raźbili pałatki pierad budynkam parłamienta i praviali tam noč, paviedamlaje «Nastojaŝieje vriemia»
U noč na 10 červienia ŭdzielniki šeścia na čale z archijepiskapam Bahratam Hałstanianam akružyli budynak parłamienta. Tam adbyvalisia łakalnyja sutyčki pamiž mitynhoŭcami i palicejskimi. Paźniej častka ŭdzielnikaŭ akcyi adpraviłasia da ŭradavych leciščaŭ na vulicy Prašana, dzie ich taksama sustreli atrady siłavikoŭ.
Pad ranicu abiedźvie hrupy abjadnalisia pierad budynkam parłamienta. Zaraz skryžavańnie pierad budynkam parłamienta było pierakrytaje mitynhoŭcami, tam raźbili pałatki.
Mitynh arhanizavaŭ ruch «Tavuš u imia Radzimy». Kiraŭnik abjadnańnia i kiraŭnik Tavušskaj jeparchii Armianskaj apostalskaj carkvy archijepiskap Bahrat Hałstanian zaklikaŭ hramadzian pačać u paniadziełak akcyju niepadparadkavańnia i mitynhavać na praciahu 96 hadzin, kab «naviazać svaju volu» uładam.
«My pavinny razam pryniać rašeńnie, my zmožam vyrašyć prablemu, kali budziem znachodzicca na vulicy čatyry dni, 96 hadzin bieź pierapynku, biez snu, nie vychodziačy na pracu», — zaklikaŭ Bahrat.
Jon źviarnuŭsia da frakcyj Nacyjanalnaha schodu z patrabavańniem inicyjavać 11 červienia sustreču, na paradku jakoj budzie adstaŭka ŭrada na čale ź Nikołam Pašynianam i farmavańnie novaha Kabinieta.
Padstavaj dla mitynhaŭ u Armienii stali terytaryjalnyja sastupki Azierbajdžanu, jakomu Armienija paabiacała pieradać niekalki pryhraničnych viosak. Baki padpisali dakumienty ab delimitacyi ŭ kancy krasavika. Pracedura vyznačeńnia stanovišča miežaŭ pavinna była pačacca ŭ čatyroch vioskach u Tavušskim rehijonie.
Sa słoŭ navukovaha supracoŭnika Instytuta prykładnoj palityki Armienii Siarhieja Miełkaniana, havorka idzie pra vioski, dzie praz sutyknieńni na armiana-azierbajdžanskaj miažy nichto nie žyvie z 1980-ch. Jany znachodziacca ŭ niejtralnaj zonie pamiž pazicyjami armij dźviuch krain.
Pratestoŭcaŭ razdražniaje pazicyja Nikoła Pašyniana i jaho ŭrada, jaki pad ciskam Azierbajdžana i aścierahajučysia novaj vajny idzie na terytaryjalnyja sastupki ŭ adnabakovym paradku.
Muzyka Cim Suładze: Roźnica 30 hadoŭ — toje, što adpaviadaje maim ujaŭleńniam pra adnosiny41
Kamientary