Rasijski bajec pra šturm Vaŭčanska: «Zastałosia 12 čałaviek sa 100. Nas kryšać: pakłali kulamiotam i dabili dronami»
Pra toje, jak adbyvajucca čarhovyja miasnyja šturmy, raskazaŭ u videazvarocie rasijski kantraktnik.
Bai za horad Vaŭčansk u Charkaŭskaj vobłaści praciahvajucca niekalki tydniaŭ. Zmahańnie idzie litaralna za kožny dom, Vaŭčansk razburany na 90%.
U adnym z pablikaŭ u telehramie źjaviłasia videa, na jakim rasijski kantraktnik Anton Andrejeŭ z 5-j roty 1009-ha motastrałkovaha pałka raskazvaje pra bai za horad.
Pa słovach bajca, pieršapačatkova aficery kazali, što jaho rota budzie znachodzicca na miažy Rasii i Ukrainy. Adnak ich adpravili ŭ Vaŭčansk. Ale pierad nastupam, jašče da ŭziaćcia apornych punktaŭ, častka bajcoŭ palehła ad artyleryjskaha ahniu.
«Apieracyja [pa ŭziaćci Vałčanska] pačałasia ŭžo nie pa časie. Pačali hnać «napierad-napierad». Minamioty bjuć, a tudy ludziej adpraŭlajuć. Za pieršuju noč pałova roty adrazu palehła. Bolšaja častka trochsotymi, dziakuj Bohu. Dvuchsotych taksama chapała», — raskazvaje akupant.
Pa słovach Andrejeva, u Vaŭčansk aficery adpravili bajcoŭ tolki z broniekamizelkami i aŭtamatami. U pieršuju noč u horadzie ŭdałosia zachapić adnu z vulic, ale paśla pačalisia maštabnyja straty:
«Bolš-mienš narmalna zaniali adnu vulicu. I potym pajšła «śpioka». Hrupu adpraŭlajuć šturmavać vulicu. Zdajecca, vulicu prachodziš. Usio narmalna. [A paśla] traplaješ pad zamies, pad kulamioty. Asabliva FPV-drony — prosta vyvodziać stolki asabistaha składu».
Pa jaho słovach, rasijskaje kamandavańnie patrabuje praciahu šturmu niahledziačy na istotnyja straty i dazvalaje adstupić tolki ŭ vypadku maksimalnych strat:
«Kamandavańnie pa racyi kryčyć «Napierad! Napierad!» Adkataŭ nielha. Nie dajuć. Nazad adyści nielha. Kali ŭžo zastaniecca čałaviek piać-dziesiać z usich hrup, tady daduć. Dyk siarod ich pałova 300-mi budzie vyvieziena».
Bajec śćviardžaje, što ź ich roty kolkaściu 100 čałaviek zastałosia 12 čałaviek. Jak jon tłumačyć, heta źviazana z tym, što «pryjšli śviežyja hrupy, jakija tolki ŭ vučebcy byli čatyry ci piać dzion». Rankam ich adpravili na šturm. «Jany dva damy nie prajšli. Ich pakłali pad kulamiotam. Jany skučkavalisia. I ich dabili FPV-dronami. Zastałosia čałaviek piać-šeść».
«Išła hrupa da nas. Ź jaje ŭvohule adzin čałaviek zastaŭsia. Atrymlivajecca, što nas kryšać prosta. I ŭsio. Adpraŭlajuć pad kulamioty, drony ŭ śvietły čas dnia. I prosta poŭnaje miasa. «Napierad, napierad»… Tak što nie viedaju, jak prapiatlaju ja, zastanusia ci nie zastanusia trochsotym-dvuchsotym», —
raskazvaje mužčyna i dadaje, što jon razumieje svajo kamandavańnie, jakoje vykonvaje zahady źvierchu. «A chto siadzić u Maskvie, im p***j».
Rasijskija vajennyja błohiery paviedamlajuć, što kantraktniki, jakija vajujuć u składzie rasijskaha 1009 motastrałkovaha pałka, admovilisia vykonvać zahad biez padtrymki techniki i nie pajšli na šturm. Paźniej kamandavańnie pryniało rašeńnie praz značnyja straty asabistaha składu (da 90%) vyvieści połk, zamianiŭšy jaho inšymi padraździaleńniami.
Kamientary