«Madeli ź vitryny ŭ Dubai, tamu tannyja». Doktarka ź Minska vyrašyła vyhadna zamović pyłasos i telefon — jaje padmanuli na vialikuju sumu

Padołah Nadzieja Rahoŭskaja ź Minska buduje z mužam ułasny dom, kudy niekalki miesiacaŭ tamu vyrašyli nabyć bytavuju techniku. Svaju sumnuju historyju jana raskazała ŭ instahramie.

Žadajučy źbierahčy siamiejny biudžet, Nadzieja pačała šukać bajera — čałavieka, jaki zmoža pryvieźci nieabchodnaje z-za miažy tańniej, — bo ceny ŭ biełaruskich kramach nie radujuć. Davoli chutka niechta sa znajomych paraiŭ źviarnucca da Ksienii, jakaja zajmajecca dastaŭkaj bujnahabarytnych hruzaŭ ź Jeŭropy i ZŠA.

Pavialičyć

Pracavała Ksienija z karha-dastaŭkaj. Zvyčajna karha-dastaŭkaj karystajucca tady, kali pradaviec viazie nievialikuju kolkaść tavaru. Naprykład, dziela 200 kiłahram hruzu nierentabielna arandavać kantejnier całkam, tamu niekalki drobnych zakazčykaŭ vykuplajuć miesca ŭ im. Ale byvaje, što pradprymalniki karystajucca šerymi schiemami: naprykład, dekłarujuć, što nibyta viazuć bižuteryju, a nasamreč pieravoziać telefony. Dziakujučy hetamu atrymlivajecca źnizić mytnyja pošliny. Karaciej, prastory dla «tvorčaści» chapaje.

Ksienija ž raspaviadała pakupnikam, što moža dastavić tavar z roznych miescaŭ śvietu ŭ Sankt-Pieciarburh, a adtul da kančatkovaha spažyŭca rassyłaje SDEK. Ceny dziaŭčyna prapanoŭvała pryjemnyja, tamu Nadziei ŭsio spadabałasia.

— Ksienija dadała mianie ŭ hrupu ŭ telehramie, skinuła spasyłku na svoj instahram — usio vyhladała vielmi praŭdapadobna, — raspaviała doktarka ŭ storys. — I adnačasova my pačali ź joj razmaŭlać na asabistyja temy.

Bajer paviedamiła, byccam taksama ciažarnaja — užo na 36-m tydni i viedaje, što dzicia narodzicca z parokam serca, tamu adrazu nieabchodna budzie rabić apieracyju. Nadzieja, kaniečnie ž, pačała škadavać budučuju maci.

— U tym čacie ty siadziš i šukaješ pazicyi, jakija ciabie cikaviać. Heta vyhladaje tak: źjavilisia try telefony — jak tolki ich zabraniravali, treba adrazu vykupić. Lista čakańnia nie isnuje. Usio vyhladała vielmi praŭdapadobna.

Prykładna 4-5 miesiacaŭ Nadzieja prahladała čat, pakul narešcie nie ŭbačyła robat-pyłasos, pra jaki maryła.

— Heta było 10 hadzin viečara, u mianie nie było hrošaj na kartcy. Tamu ja patelefanavała siabroŭcy, kab jana pazyčyła.

Žančyna chutka apłaciła zamovu, a bajer napisała, što zamova paćvierdžana i treba čakać adpraŭku. Potym Nadzieja pryhladałasia da čahości biudžetnaha, ale Ksienija adhavorvała jaje ad pakupak. Paralelna bajer raskazvała pra svaju ciažarnaść i navat adpraŭlała zdymki UHD.

Dalej doktarka ŭsio ž apłaciła jašče niekalki darahich pakupak — televizar i telefon.

— Ja spytała: «Słuchaj, a jak telefon dajedzie?» Jana adkazała, što telefony laciać z Dubaja — byccam by heta raspakavanyja madeli ź vitryny, tamu takija tannyja. Ja ž kažu: «Kantejnier ža dla ich nie padydzie?». Ksienija śćviardžała, što telefony palaciać sa ściuardami.

Nadzieja čakała zamoŭlenaje, a Ksienija raspaviadała, što voś tolki naradziła, a z dakumientami niejkija prablemy — byccam by vyjšła niejkaja novaja pastanova, praź jakuju na tavarach treba mianiać usie štrych-kody.

— Paśla taho, jak usie terminy minuli — heta było 22 maja — ja była ŭ Polščy i vyrašyła spytać u Ksienii, dzie ž maja zamova. I raptam razumieju, što mnie niama kamu pisać — z supołki mianie vydalili, usiu pierapisku jana pačyściła, u instahramie zabłakavała.

Pavialičyć

Ciapier doktarka choča papiaredzić astatnich, kab jany nie trapili ŭ pastku machlaroŭ. Akaŭnt bajera Ksienii maje 165 tysiač padpisčykaŭ u instahramie. Tam paznačana, što žyvie žančyna ŭ Hiermanii i ZŠA, a pracuje tolki na ŭmovach 100% pieradapłaty. U storys kruciacca tavary, jakija byccam by možna chutka nabyć: naprykład, prapanoŭvajuć iPhone 13 i iPhone 13 Pro Max usiaho za 330 dalaraŭ z tłumačeńniem, što košt taki, bo niama karobak.

• 3
• 0
• 14
• 9
• 2
• 2
• 5
• 0