Viadomy biełaruski ekśpiert ciapier budzie navučać studentaŭ biznes-ekanomicy.
EHU i daśledčycki instytut BEROC sioleta zapuskajuć bakałaŭrskuju prahramu «Biznes-ekanomika». Płany — navučać ekanamistaŭ z karjernymi pierśpiektyvami ŭ Jeŭropie.
Prahramu ŭznačaliŭ ekanamist Dźmitryj Kruk. Jon raskazvaje, što dla BEROC doŭhi čas isnavała meta raspačać paŭnavartasny bakałaŭryjat pa ekanomicy, i padčas pracy ŭ Biełarusi instytut niekalki razoŭ sprabavaŭ heta zrabić, ale ŭsie sproby błakavalisia.
Pry hetym dobraje razumieńnie i płan, jak heta rabić, u arhanizacyi byli i jość, kaža Kruk. Tamu kali źjaviłasia mahčymaść zładzić prahramu, ni dla BEROC, ni asabista dla Kruka nie stajała pytańnie, bracca za heta ci nie.
U prahramu Dźmitryj płanuje pryŭnieści sučasnyja praktyki i ŭłasnyja noŭ-chaŭ u ekanamičnaj i biznes-adukacyi: «My damo studentam mahčymaść supracoŭničać z zamiežnymi studentami i vykładčykami. Pry hetym pakolki bolšaść na prahramie — biełarusy, niepasrednaje asiarodździe budzie bolš zvykłym i studenty paźbiehnuć šoku adaptacyi. Dadatkova my dajem mahčymaść płaŭna adaptavacca, bo pierachodzim na anhlijskuju movu vykładańnia pastupova».
Taksama Kruk abiacaje dać studentam mahčymaść pracavać i kamunikavać z realnym biznesam dy navat zapuskać ułasnyja startapy ŭžo ŭ pieryjad navučańnia. Pra toje, jak idzie nabor, pakul kazać rana — abituryjenty ź Biełarusi jašče nie zdali ispyty i nie atrymali siertyfikaty. Ale, kaža Dźmitryj, užo ciapier vidać istotny popyt na prahramu, naprykład, ad ludziej, jakija raniej atrymali siaredniuju ci vyšejšuju adukacyju.
«Naša Niva» — bastyjon biełaruščyny
PADTRYMAĆ
Kamientary