Hety nasieleny punkt staŭ adnym z farpostaŭ supracivu rasijskaha nastupu na Danbasie.
Režysior i były palitviazień Aleh Siancoŭ, jaki naradziŭsia ŭ Krymie, znachodzicca ŭ horadzie Časaŭ Jar, jaki ciapier źjaŭlajecca adnym z hałoŭnych farpostaŭ na Danbasie. Pra heta Aleh Siancoŭ paviedamiŭ na svajoj staroncy ŭ fejsbuku.
«Trymajem Časik», — napisaŭ jon.
Raniej hałoŭnakamandujučy Uzbrojenych Sił Ukrainy Alaksandr Syrski paviedamlaŭ pra abvastreńnie situacyi na poli boju i aktyŭnych napadaŭ z boku vojskaŭ RF.
«Na Kramatorskim kirunku samymi haračymi kropkami zastajucca Ivanaŭskaje i Časaŭ Jar», — adznačyŭ Syrski.
Aleh Siancoŭ byŭ aktyŭnym udzielnikam Jeŭramajdana. Tady byŭ režysioram ź niekalkimi premijami. Udzielničaŭ u Aŭtamajdanie. Paśla akupacyi Kryma jon časta jeździŭ u rodny Simfieropal, dzie sprabavaŭ arhanizavać mitynhi «za adzinuju krainu». Siancoŭ byŭ taksama vałancioram, pieradavaŭ pradukty i inšyja rečy pieršaj nieabchodnaści ŭkrainskim vajskoŭcam, jakija znachodzilisia na paŭvostravie, piša «Suśpilnie».
10 traŭnia 2014 hoda rasijskija siłaviki zatrymali jaho ŭ Simfieropali pavodle padazreńnia ŭ «padrychtoŭcy dyviersijna-terarystyčnych aktaŭ u šerahu haradoŭ» Kryma.
Siancova prysudzili da 20 hadoŭ pazbaŭleńnia voli z adbyvańniem pakarańnia ŭ kałonii strohaha režymu. U vieraśni 2019 hoda Ukraina viarnuła pa abmienie Aleha Siancova i Alaksandra Kolčanki.
Ź pieršych dzion poŭnamaštabnaha ŭvarvańnia Rasii ŭ 2022 hodzie jon staŭ na abaronu Ukrainy. Krymski režysior słužyć u 47-j miechanizavanaj bryhadzie USU «Mahura». Niekalki razoŭ byŭ paranieny, ale viartaŭsia ŭ stroj. U 2023 hodzie ŭ červieni jon atrymaŭ zvańnie małodšaha lejtenanta. Siancoŭ staŭ apierataram NLAW (najnoŭšy pieranosny supraćtankavy rakietny kompleks).
Kamientary