Demakratyčnaja lidarka Biełarusi Śviatłana Cichanoŭskaja 29-30 krasavika naviedaje Narviehiju.
Sustrečy z uładami Narviehii zapłanavanyja padčas vizitu biełaruskaha demakratyčnaha lidara Śviatłany Cichanoŭskaj u Osła 29—30 krasavika, paviedamiŭ «Pozirku» hałoŭny daradca palityka Franak Viačorka.
29 krasavika demlidar sustreniecca z pradstaŭnikami daśledčych centraŭ, hramadzianskaj supolnaści i asobnymi žurnalistami; praviadzie pieramovy z členami parłamienckaha kamiteta pa zamiežnych spravach i abaronie, a zatym — sa śpikieram Stortynha Masudam Harachani. Zapłanavanaja adkrytaja sustreča z Narviežskim Chielsinkskim kamitetam i biełaruskaj dyjasparaj u asobach členaŭ supolnaści Razam. Prahrama zavieršycca viačeraj, jakuju arhanizuje namieśnik ministra zamiežnych spraŭ Ejvind Vad Pietersan.
U druhi dzień vizitu Cichanoŭskaja praviadzie pieramovy z kiraŭnikom MZS Eśpienam Bartam Ejde, premjer-ministram Jonasam Haram Store, pradstaŭnikami parłamienckaj hrupy «Za demakratyčnuju Biełaruś», meram Osła Anne Lindbu, hienieralnym dyrektaram Departamienta palityki biaśpieki i Krajniaj Poŭnačy ŭ MZS, ministram kultury Lubnaj Jafieru. Demlidar taksama vystupić na kanfierencyi Words Matter!
Pavodle słoŭ Viačorki, heta «doŭhačakany, zapłanavany» vizit. Z pradstaŭnikami narviežskich uładaŭ płanujecca abmierkavać pytańni «pavieličeńnia finansavańnia niezaležnych ŚMI, hramadzianskaj supolnaści i biełaruskich kulturnych inicyjatyŭ, padtrymki dla reabilitacyi byłych palitviaźniaŭ i dziaciej represavanych».
«Narviehija ŭžo padtrymlivała siemji represavanych, palitviaźniaŭ, ale my zaraz budziem kazać pra bolš sistemnuju prahramu reabilitacyi palitviaźniaŭ», — adznačyŭ hałoŭny daradca palityka.
«Nu i dypłamatyčny trek — kab Narviehija farmalizavała stasunki z demakratyčnymi siłami», — dadaŭ jon, patłumačyŭšy, što havorka ŭ tym liku pra sumiesnyja dziejańni ŭ mižnarodnych arhanizacyjach.
Nahadaŭšy, što Narviehija nie ŭvachodzić u Jeŭrasajuz, Viačorka padkreśliŭ važnaść dla demsił taho, kab Osła «sinchranizavaŭ ź ES i ZŠA stratehiju pa pytańni sankcyj, pryciahnieńnia režymu da adkaznaści».
Na sustrečy z uładami, pavodle jaho słoŭ, taksama buduć abmiarkoŭvacca temy pracy hrupy padtrymki demakratyčnaj Biełarusi ŭ narviežskim parłamiencie; abmienu infarmacyjaj pa pytańniach biaśpieki i vajskovych pytańniach; padtrymki biełaruskaj dyjaspary i lehalizacyi.
«Narviehija ŭžo akazvaje dapamohu — jana dałučyłasia da mižnarodnaj płatformy pa zbory dokazaŭ złačynstvaŭ Łukašenki, kaalicyi «Za demakratyčnuju Biełaruś» u ABSIE. Narviehija na aficyjnym uzroŭni źmianiła nazvu «Biełaja Rasija» na «Biełaruś» (Hviterussland na Belarus), padtrymała nas na mižnarodnym uzroŭni. Narviehija vielmi ćviorda nas padtrymlivaje z 2020 hoda, navat raniej. Vielmi pryncypovyja, paśladoŭnyja, nadzvyčaj važny kantakt i važny hołas», — padsumavaŭ Viačorka.
Tolki žminda i lanivy nie padtrymlivaje «Nivy»! Vy možacie za chvilinu padtrymać «NN» padachodnym, nie patraciŭšy ni kapiejki svaich5
Kamientary
a v tiuŕmie siehodnia makarony