Milicyjanier afarmlaŭ administratyŭki na nievinavatych ludziej, jaho pasadzili
29 sakavika sud Partyzanskaha rajona Minska prysudziŭ byłoha ŭčastkovaha da troch hadoŭ kałonii pavodle artykuła ab złoŭžyvańni słužbovymi paŭnamoctvami (častka 2 artykuła 426 KK). Jon afarmlaŭ administracyjnyja spravy na nievinavatych ludziej, piša «Lusterka» sa spasyłkaj na bank sudovych rašeńniaŭ.
Dla falsifikacyi ŭčastkovy vybiraŭ čaściej za ŭsio spravy, jakija tyčylisia šumu ŭ kvaterach i damach, a taksama za raśpićcio ałkaholu ŭ hramadskim miescy. Nieraskrytuju spravu abvinavačvany afarmlaŭ na mierkavanaha parušalnika abo vybiraŭ jaho prosta z žycharoŭ svajho ŭčastka. Urešcie ŭčastkovy składaŭ pratakoły apytańnia «parušalnika» i vypisvaŭ jamu papiaredžańnie.
Vyśvietliłasia, što milicyjant takim čynam vynies 14 niezakonnych pastanoŭ. Ale ŭrešcie heta vyjavili, supracoŭnika milicyi zvolnili i zaviali na jaho kryminalnuju spravu. Da suda abvinavačany znachodziŭsia na voli pad asabistym paručalnictvam i padpiskaj ab niavyjeździe.
Na sudzie abvinavačany pryznaŭ svaju vinu i patłumačyŭ, navošta heta rabiŭ. Maŭlaŭ, padčas słužby ŭ Partyzanskim RUUS na jahonym učastku mocna nie chapała milicyjanieraŭ, jon pracavaŭ adzin, była vialikaja zahružanaść i jon nie spraŭlaŭsia. Da taho ž byvała, što pačynałasia pravierka pa administracyjnaj spravie, ale nie zaŭsiody ŭdavałasia va ŭstanoŭleny termin vyznačyć parušalnika, źviazacca ź im, vyśvietlić, dzie jon znachodzicca. A ŭ pieryjad, kali jon pracavaŭ u Leninskim rajonie, da hetaha dadavałasia toje, što na ŭčastku byŭ składany kantynhient, šmat ludziej, ź jakimi treba pravodzić prafiłaktyčnuju pracu.
Tamu mužčyna i vyrašyŭ u niekatorych vypadkach biez vykliku fihurantaŭ składać pa materyjałach pravierak i padpisvać ad ich imia tłumačeńni, pratakoły ab praviadzieńni hutarak i h. d., a paśla spyniać spravy, vynosiačy tolki papiaredžańnie. Heta dazvalała jamu paźbiehnuć pretenzij načalstva za niavyrašanyja spravy i drennyja pakazčyki.
U vyniku sud pastanaviŭ pryznačyć byłomu milicyjanieru try hady pazbaŭleńnia voli ŭ kałonii va ŭmovach ahulnaha režymu. Taksama jon abaviazany vypłacić štraf pamieram 300 bazavych vieličyń, heta značyć 12 000 rubloŭ. Akramia taho, mužčynu zabaranili zajmać milicejskija pasady na piać hadoŭ. Asudžanaha ŭziali pad vartu ŭ zale suda.
Kamientary
https://t.me/allians_belarus/196