«Biełpoł» zatroliŭ Ihara Tura — zdabyli paśviedčańnie prapahandysta z Usiebiełaruskaha schodu
U adkaz na pašpart novaj Biełarusi, jaki vyrabili prapahandysty, «Biełpoł» pakazaŭ uzor paśviedčańnia ŭdzielnika Usiebiełaruskaha narodnaha schodu na imia Ihara Tura.
Na kanale abjadnańnia byłych siłavikoŭ Biełarusi «Biełpoł» źjaviłasia videa, u jakim Maćviej Kuprejčyk zajaŭlaje, što im pieradali «adnu vielmi dziŭnuju reč i prasili pieradać pryvitańnie adnamu adyjoznamu prapahandystu».
Zatym mužčyna demanstruje paśviedčańnie delehata Usiebiełaruskaha narodnaha schodu (UNS), aformlenaje na imia Ihara Tura.
«Dziŭnaja štukovina, minułaje stahodździe», — kamientuje Kuprejčyk i tłumačyć, što sens zaklučajecca ŭ inšym. Nasamreč u jaho ŭ rukach padrobka, takaja ž samaja, jak i pašparty novaj Biełarusi, jakija «radasna i vilajučy chvościkam demanstravaŭ Tur u efiry «prapahandyst TB».
Ale pikantnaść situacyi, praciahvaje Kuprejčyk, zaklučajecca ŭ tym, što kali ŭzory pašparta novaj Biełarusi byli ŭ adkrytym dostupie, to rekvizitaŭ paśviedčańnia delehata UNS nie było.
«Iharok, spytaješ tam u svaich haspadaroŭ, dzie možna znajści takija dakumienciki», —
źjedliva havoryć pradstaŭnik «Biełpoła» i tłumačyć, što jon chacieŭ skazać svaim pierformansam:
«Unutry sistemy zastajecca vializnaja kolkaść sumlennych i spraviadlivych biełarusaŭ. 2020 hod pakazaŭ, što nas z vami bolšaść. I vielmi chutka, ja ŭpeŭnieny, nastanie čas, kali my ŭsie razam budziem budavać novuju Biełaruś. Razam da pieramohi».
Kamientary