U Iranie sud pryhavaryŭ da śmierci načalnika palicyi za zabojstva pratestoŭca. Što?
Vielmi niezvyčajnaje rašeńnie sudovaj sistemy Irana było vyniesiena ŭ dačynieńni da načalnika palicyi, čyje padnačalenyja zabili adnaho ź mitynhoŭcaŭ padčas antyŭradavych masavych pratestaŭ 2022 hoda. Padrabiaznaści raskazaŭ «Hołas Amieryki».
Iranski sud vynies śmiarotnaje pakarańnie načalniku miascovaj palicyi na poŭnačy Irana z-za zabojstva demanstranta padčas masavych pratestaŭ u 2022 hodzie, paviedamlaje «Hołas Amieryki» sa spasyłkaj na iranskija miedyja.
Pavodle abvinavaŭčaha prysudu, aficer Džafar Džavanmardzi, užo były načalnik miascovaj palicyi ŭ horadzie Bender-Enzeli (iranskaja paŭnočnaja pravincyja Hilan), byŭ aryštavany ŭ śniežni 2022 hoda za «parušeńnie praviłaŭ vykarystańnia ahniastrelnaj zbroi» i «naŭmysnaje zabojstva» 27-hadovaha mužčyny Miechrana Samaka, jaki «ŭdzielničaŭ u mitynhu».
«Miechran Samak byŭ zastreleny z drabavikoŭ iranskimi siłami biaśpieki paśla taho, jak pasihnaliŭ na svaim aŭtamabili ŭ honar projhryšu Irana na čempijanacie śvietu pa futbole ŭ Katary, jaki adbyvaŭsia padčas masavych antyŭradavych pratestaŭ u Iranie», — pieradaje «Hołas Amieryki» sa spasyłkaj na iranskich pravaabaroncaŭ, jakija znachodziacca za miažoj.
Jak adznačyŭ advakat achviary, śmiarotny prysud načalniku palicyi byŭ vyniesieny pavodle isłamskaj tradycyi kreŭnaj pomsty pad nazvaj «kisas» («voka za voka»), jakoje pryznačajecca šaryjackimi sudami ŭ vyklučnych vypadkach za naŭmysnaje zabojstva i cialesnyja paškodžańni niezvarotnaha charaktaru.
Nahadajem, što masavyja pratesty ŭ Iranie ŭ kancy 2022 hoda byli vyklikanyja zabojstvam 22-hadovaj Machsy Amini paśla taho, jak jaje zatrymała «palicyja noravaŭ» krainy. Dziaŭčyna adrazu stała hałoŭnym simvałam pratestaŭ iranskaha hramadstva za pieramieny.
Pravaabaroncy ŭ Iranie, jakija adsočvajuć represii, paviedamlali, što padčas pratestaŭ byli aryštavanyja dziasiatki tysiač čałaviek. Pa ich infarmacyi, jak minimum 530 čałaviek byli zabityja ŭ vyniku žorstkaha zadušeńnia demanstracyj uładami.
22 tysiačy pratestoŭcaŭ potym byli aficyjna pamiłavanyja.
«U Iranie sistema ŭstojlivaja, bo tam niama manapolii na ŭładu». Uschodaznaŭca raskazaŭ, ci mohuć pratesty pieramahčy i jak zbudavanaja hetaja ŭnikalnaja palityčnaja sistema
ZŠA tajemna papiaredzili Iran ab padrychtoŭcy teraktu na mohiłkach, ale toj dazvoliŭ jamu zdarycca
Urad Francyi padaść u sud na vučanicu-musulmanku, z-za kanfliktu ź jakoj zvolniŭsia dyrektar
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii18
Kamientary