Jak ukrainskaja sistema spufinhu «Pakrovy» źbivaje z pantałyku «Šachiedy»

Jak piša Forbes, Ukraina stvaryła ahulnanacyjanalnuju sistemu radyjoelektronnaj baraćby pad nazvaj «Pakrovy». Jana nazvana ŭ honar śviata Pakrovy Praśviatoj Baharodzicy. 

Hetaja sistema daje mahčymaść zamieny spadarožnikavaha radyjonavihacyjnaha pola («spufinh») i zahłušeńnia spadarožnikavaj radyjonavihacyi pa ŭsioj linii sudakranańnia i na bolšaj častcy terytoryi Ukrainy. Stvoranyja sistemaj pieraškody pierahružajuć navihacyjnyja sistemy (GPS i inšyja, naprykład, rasijskuju HŁONASS) i prymušajuć vydavać niapravilnaje miescaznachodžańnie, hienierujučy falšyvy sihnał.

Bolšaść viadomych prykładaŭ prypadaje na Rasiju. Kiroŭcam, jakija znachodziacca pablizu Kramla, navihatar kaža, što jany znachodziacca ŭ aeraporcie, a karabli ŭ Čornym mory mohuć zdavacca źmieščanymi na šmat milaŭ usiaredzinu terytoryi krainy.

Ukraina i raniej źbivała rasijskija bieśpiłotniki z dapamohaj spufinhu na karotkich dystancyjach, ale «Pakrovy» pracujuć na značna bolšaj adlehłaści. Heta technična składanaja zadača.

Ekśpiert brytanskaha abaronnaha analityčnaha centru RUSI Tomas Vitynhton (Thomas Withington) raskazaŭ Forbes, što dla hetaha spatrebicca sietka idealna sinchranizavanych pieradatčykaŭ. Ukraincy ŭžo vykarystoŭvajuć padobnuju sinchranizavanuju sistemu kiravańnia radarami ŭ svajoj nacyjanalnaj sietcy SPA, tamu znajomyja z hetaj śfieraj.

Pahroza «Šachiedam»

Bieśpiłotnik «Šachied» dobra abaronieny ad sistem radyjoelektronnaj baraćby. Viersija, jakaja ciapier vykarystoŭvajecca Rasijaj, asnaščanaja navihacyjnym błokam «Kamieta-M», jaki dazvalaje identyfikavać i vyklučać sihnały pieraškod. Drony z «Kamietaj-M» mohuć znajści darohu, kali pieraškody ŭ dziasiatki tysiač razoŭ mahutniejšyja za spadarožnikavy sihnał.

«Šachied» taksama abstalavany reziervovym iniercyjnym navihacyjnym błokam. Jon pracuje navat pry adsutnaści spadarožnikavaha sihnału prykładna na praciahu adnoj chviliny. Ale hetaha času dastatkova, kab parazić cel, abaronienuju miascovym hłušycielem, abo pralacieć praz pałasu pieraškod i zatym adnavić spadarožnikavy sihnał.

Takoje spałučeńnie robić dron ciažkadastupnym dla zvyčajnych srodkaŭ radyjoelektronnaj baraćby. Ale va ŭkrainskich inžynieraŭ była mahčymaść razabrać niekalki «Šachiedaŭ» i znajści ŭraźlivyja miescy ŭ ich navihacyjnaj sistemie.

Prykmiety vykarystańnia

Pra isnavańnie va ŭkrainskaha boku mahčymaści supraćdziejničać sistemie «Kamieta-M» u vieraśni minułaha hoda zajaŭlaŭ načalnik Hałoŭnaha ŭpraŭleńnia radyjoelektronnaj baraćby i kibierbiaśpieki ŭkrainskaha Hienštaba Ivan Paŭlenka.

«Šachied-136» ź jaho adnosna nievialikaj bojehałoŭkaj masaj kala 45 kh pavinien nanieści ŭdar blizka da celi, kab damahčysia jakoha-niebudź efiektu. Sistema dazvalaje adšturchnuć bieśpiłotnik ad celi na paŭkiłamietra. Heta harantuje poŭny promach, choć usio adno pry padzieńni jon moža štości paškodzić.

Rasijskija kryłatyja i balistyčnyja rakiety koštam u niekalki miljonaŭ dalaraŭ majuć bolš daskanałyja navihacyjnyja sistemy, jakija nie spadziajucca na spadarožnikavyja sihnały. Adnak bolšaja častka rasijskich napadaŭ ciapier robicca z dapamohaj mienavita «Šachiedaŭ», jakija ŭraźlivyja.

Valeryj Załužny, na toj momant hałoŭnakamandujučy USU, raskryŭ isnavańnie sistemy «Pakrovy» ŭ listapadzie minułaha hoda ŭ dakumiencie, u jakim vykłaŭ svaje płany pa vychadu z tupikovaj situacyi, što skłałasia na froncie. Załužny nie paviedamiŭ, kali «Pakrovy» byli aktyvavanyja, ale jość niekatoryja prykmiety taho, što jany pracujuć.

3 lutaha aficyjny telehram-kanał VPS Ukrainy zajaviŭ, što napiaredadni viečaram było źbita 11 «Šachiedaŭ», a «akramia taho, jak minimum siem udarnych bieśpiłotnikaŭ nie dasiahnuli celaŭ». Taksama niadaŭna byli zafiksavanyja vypadki, kali «Šachiedy» byli zachoplenyja niepaškodžanymi i, miarkujučy pa ŭsim, niejtralizavanyja srodkami radyjoelektronnaj baraćby, a nie rakietnym ci artyleryjskim ahniom.

Last night, Ukrainian defenders landed a Shahed kamikaze drone using electronic warfare systems in the Dnipropetrovsk Oblast (eastern Ukraine)

The police reported that the drone warhead did not explode. It will be removed and disposed of.

Ukraine's National Police pic.twitter.com/UU1lNpD26c

— Euromaidan Press (@EuromaidanPress) February 9, 2024

Vydańnie adznačaje, što niemahčyma skazać, nakolki efiektyŭnaja sistema «Pakrovy» ci jak mienavita jana padmianiaje navihacyjnyja sihnały. Ukraina nie raskryvaje padrabiaznaściaŭ, kudy drony nanosiać svaje ŭdary, pazbaŭlajučy Rasiju infarmacyi pra toje, kolki ź ich dasiahajuć celaŭ.

Jak adznačajecca ŭ artykule, rasijskija raspracoŭščyki buduć sprabavać supraćstajać spufinhu, a ŭkraincy buduć madyfikavać svaju sistemu. U toj ža čas, navat kali «Šachied» nie źbity, heta jašče nie značyć, što jon trapiŭ u cel.

Čytajcie jašče:

Rasija znoŭ atakavała Ukrainu bieśpiłotnikami i rakietami. U Kryvym Rohu druhi dzień zapar pieraboi z elektryčnaściu

U Kijevie dastali ź ziamli bajavuju častku źbitaha «Kinžała» — heta dapamoža jašče lepš vyvučyć rasijskija rakiety

Bomby, nadrukavanyja na 3D-pryntary: novaja zbroja Ukrainy ŭ abaronie suprać Rasii

• 78
• 0
• 1
• 2
• 5
• 6
• 5
• 0