«Nu i chto ich kupić?» U biełaruskich kramach znajšli hryby pa 500 rubloŭ za kiło
Čarhovy «załaty» pradukt znajšli pakupniki ŭ adnoj ź biełaruskich kramaŭ handlovaj sietki «Hipa»: upakoŭku hryboŭ tam pradajuć za 24,97 rubla, ale heta — košt za ŭpakoŭku vahoj usiaho 50 hram, heta značyć košt kiłahrama praduktu składaje 499,4 rubla, zaŭvažyŭ Telegraf.news.
Videa z kramy z darahimi hrybami padzialilisia ŭ tyktoku žurnalisty partała Slivki.by. Vyjaviłasia, što havorka zusim nie pra zamorskija trufieli, jakija ličacca samymi darahimi hrybami, a pra zvykłyja dla biełarusaŭ baraviki.
Pad videa samym papularnym razam z pytańniem «za što takija hrošy?» akazałasia rytaryčnaje pytańnie, «nu i chto ich kupić?», namiakajučy na zavobłačnuju canu.
Mnohija biełarusy adznačyli, što pradukt naŭrad ci budzie karystacca vialikaj papularnaściu, kali «ŭ lesie biaspłatnyja» hryby, a minuły hrybny siezon vydaŭsia vielmi «ŭradžajnym» dla biełaruskich hrybnikoŭ.
«Hryby hetyja nichto nie kupić. Dy i ŭ lesie pa siezonie ich było stolki, što raśli hetyja hryby navat u haradskich parkach», — adznačyŭ adzin z kamientataraŭ.
Mnohija hledačy pad videa vychvalalisia svaimi zapasami. «U mianie takich štučak dva trochlitrovyja słoiki i adzin dvuchlitrovy», — napisała adna dziaŭčyna, a inšy kamientatar raskazaŭ, što ŭ 2023 hodzie «nasušyŭ 27 kiło ŭ suchim vyhladzie, dla supčyka, jajek z hrybami, piražkoŭ, pirahoŭ i inšaha».
Uźnikła ŭ hledačoŭ i słušnaje pytańnie, čamu ŭ hrybny siezon narychtoŭčyja punkty prymajuć u ludziej tyja ž hryby pa «vielmi nizkich cenach», kali ich vynikovy košt taki vysoki. Jak adznačyli sami aŭtary videa, «voś dzie žyvyja hrošy», kali mierkavać vyklučna pa cenach na pryłaŭkach mahazinaŭ.
Miž tym heta daloka nie rekordnaja cana na suchija baraviki, jakuju adznačali pakupniki ŭ Biełarusi. Minułaj vosieńniu ŭ adnoj z kramaŭ biełaruskaj handlovaj sietki Green zaŭvažyli sušanyja baraviki polskaj vytvorčaści koštam 649,5 rubla za kiło.
Kamientary