«Pradajecca tolki na RF». Jak u Biełarusi źjaŭlajucca aŭtamabili ź Jeŭropy, jakija nielha nabyć miascovym
Jość niekalki machlarskich schiemaŭ. Časam čałaviek moža i nie viedać, nakolki darahoje aŭto ŭvieźli na jaho imia.
Afarmleńnie biez davieranaści
Bolš za 90% aŭto, jakija ŭvoziać fizičnyja asoby ŭ Biełaruś z trecich krain, razmytnivajucca pa 140-m ukazie, jaki dazvalaje apłačvać 50% mytu. Prava na lhotu majuć invalidy 1 i 2 hrupy, šmatdzietnyja baćki, a taksama baćki abo apiekuny dziaciej ź invalidnaściu. Mienavita ludzi z hetaj katehoryi stanoviacca achviarami šerych schiem, kali aŭtamabil razmytnivajuć praź Biełaruś, a potym nakiroŭvajuć u Rasiju.
Padmanvajuć ilhotnikaŭ, kali impartujuć darahija mašyny, u tym liku novyja. Na aŭtamabili, z momantu vypusku jakich nie prajšło try hady, pamier mytu zaležyć nie ad abjomu ruchavika, a ad koštu.
Naprykład, za aŭtamabil koštam 50 tysiač jeŭra myta składaje 24 tysiačy jeŭra (48% ad mytnaj vartaści). A kali razmytnivać jaho na lhotnika, to zamiest 24 tysiač treba budzie zapłacić 12. Roźnica kałasalnaja, i čym daražej aŭtamabil, tym bolš adčuvalnaj budzie roźnica ŭ mytnym płaciažy.
Znajści lhotnika, hatovaha aformić na sabie aŭto za 50, 100 i bolej tysiač jeŭra, składana, bo taki čałaviek musić mieć vielmi vysoki zarobak, kab potym da jaho nie ŭźnikała pytańniaŭ z boku padatkovaj.
Tamu časam działki mohuć navat nie paviedamić ilhotniku, što ad jaho imia niechta kuplaje aŭtamabil.
Tak było ź invalidam-vazočnikam pieršaj hrupy, na imia jakoha razmytnili Porsche za 86 000 jeŭra. Važna, što mužčyna nie afarmlaŭ davieranaści.
Adzinaje, što jon rabiŭ — pieradavaŭ svajmu znajomamu kopiju pašparta i aryhinał paśviedčańnia invalida, ale toj na nastupny dzień paśviedčańnie viarnuŭ i skazaŭ, što ździełka nie adbyłasia. Tamu lhotnik nijakaj hrašovaj uznaharody nie atrymlivaŭ i pra toje, što na jaho imia byŭ nabyty aŭtamabil, daviedaŭsia tolki tady, kali pryjšoŭ zapyt z padatkovaj z prośbaj patłumačyć, adkul u jaho dachod na kuplu aŭto za 86 tysiač jeŭra.
Jak vyśvietliłasia, aŭtamabil sapraŭdy byŭ razmytnieny nie pa davieranaści, a ad imia invalida. Podpisy ŭ dakumientach nie supadali z uzoram u pašparcie, a sam mužčyna praź fizičny stan nie moh razmytnić aŭtamabil.
Daražeznaje aŭto ŭ Biełarusi nie zatrymałasia, a było pierapradadziena ŭ Rasiju.
Aŭtamabili nie dajazdžajuć da biełaruskaha DAI
Jak patłumačyŭ «Naša Nivie» čałaviek, znajomy ź situacyjaj, mašyn, jakija pradajucca na RF adrazu paśla prachodžańnia mytnaj ačystki, abychodziačy rehistracyju ŭ DAI, šmat.
«Dla nastupnaj rehistracyi aŭto ŭ RF dastatkova rukapisnaj damovy kupli-prodažu. Tamu niaredka mašyny, jakija pryvoziać pad kankretnaha klijenta z Rasii, pierapradajuć, nie rehistrujučy ŭ biełaruskim DAI».
Surazmoŭca paćvierdziŭ, što pry damoŭlenaści z dekłarantam razmytnić aŭtamabil pa lhocie možna, nie majučy davieranaści. Dastatkova mieć kopiju pašparta i aryhinał paśviedčańnia.
«Heta čystaje kidałava, jakoje moža paciahnuć na kryminałku», — ličyć surazmoŭca i adznačaje, što pakul takija vypadki davoli redkija.
Darahi Mercedes zamiest tannaha Opel
Kudy bolš papularnaja schiema padmanu lhotnikaŭ vyhladaje inakš: lhotnik afarmlaje davieranaść i atrymlivaje ŭznaharodu, ale jamu abiacajuć, što kupiać na jaho imia niedarahi aŭtamabil, a nasamreč mohuć nabyć aŭto, jakoje kaštuje navat bolš za sto tysiač.
Padobnaja schiema znoŭ ža pracuje tolki dziakujučy tamu, što mašyna pierapradajecca ŭ Rasiju. U Biełarusi pierapradać aŭtamabil biez pastanoŭki na ŭlik u DAI niemahčyma. Inakš by padmanuty lhotnik daviedaŭsia, što ad jaho imia kupili i razmytnili nie ŭmoŭny Opel za 10 tysiač jeŭra, a Mercedes za 100 tysiač.
Dniami adzin z błohieraŭ-aŭtapadborščykaŭ raspaviadaŭ u instahramie, jak ahladaŭ mašynu klijentu, ale nie zmoh nabyć jaje praz toje, što pradaviec admoviŭ u prodažy dla hramadzian Biełarusi, spasłaŭšysia na toje, što ŭ mašyny padrychtavany pakiet dakumientaŭ dla prodažy na RF.
Jaskravy prykład takoj schiemy — vypadak z žycharom Śvisłackaha rajona, jaki aformiŭ davieranaść i «nabyŭ» sabie Porsche 911 Carrera 4S za 42 tysiačy jeŭra.
Premijalny kabryjalet, razmytnieny na mužčynu ź invalidnaściu, nie stavili na ŭlik u Biełarusi, a adrazu zarehistravali ŭ Rasii.
Čytajcie taksama:
Xiaomi prezientavała svoj pieršy elektramabil
Znakamity lichtarščyk z Bresta pakazaŭ svoj «Maskvič-412», ź jakim nie žadaje rasstavacca
Kitajskija mašyny zamiest jeŭrapiejskich, čerhi pa Geely, luksavyja aŭto dla rasijan. Jak za hod źmianiŭsia aŭtamabilny rynak
Kamientary