«Za 7 hadoŭ zarobak vyras amal udvaja». Kolki zarablajuć biełaruskija kiroŭcy ŭ Jeŭropie
Dziasiatki tysiač biełarusaŭ pracujuć kiroŭcami hruzavikoŭ u Polščy, Litvie i inšych krainach ES. «Naša Niva» pacikaviłasia, kolki jany realna zarablajuć.
Kolki vychodzić za sutki?
Kiryła siem hadoŭ pracuje kiroŭcam-dalnabojščykam u polskaj firmie. Mužčyna kaža, što za hety čas jahony zarobak vyras amal udvaja. Ciapier za sutki jon atrymlivaje kala 100 jeŭra.
«Kali pačynaŭ u 2017 hodzie, sutačnyja składali 50 jeŭra, paśla — 55. Nabraŭšysia dośviedu, ja pajšoŭ na firmu, dzie płacili ŭžo pa 60», — zhadvaje mužčyna.
Asabliva adčuvalny rost zarpłaty ŭ jaho byŭ apošnija 2-3 hady. Hod tamu Kiryła znoŭ pierajšoŭ u inšuju firmu. Kaža, što ciapier za sutki pracy atrymlivaje 420 złotych (kala 105 jeŭra pa biahučym kursie).
«Ale apłačvajuć tolki pracoŭnyja dni. Kali «kruciš» pierapynki pa 24 i 45 hadzin, zarpłatu nie naličvajuć. Tamu z ulikam vychodnych, jakija ŭsio adno baviš u kabinie, vychodzić niedzie 350 złotych (kala 87 jeŭra) za sutki znachodžańnia na pracy».
Kiryła zvyčajna pravodzić u rejsie pa dva miesiacy, potym na 2-3 tydni jedzie ŭ Biełaruś. Mužčyna adznačaje, što ciapier akazaŭsia ŭ vyjhryšy praz toje, što złoty za apošni čas umacavaŭsia adnosna dalara i jeŭra.
«Try miesiacy tamu jeŭra byŭ pa 4,4 złotaha, ciapier apuściŭsia da 4. Tamu ŭ valutnym vymiareńni zarobak padros amal na 10%», — kaža surazmoŭca.
«Na firmie zaŭždy znojduć, za što aštrafavać kiroŭcu»
Michaił taksama pracuje kiroŭcam u polskaj kampanii i vykonvaje rejsy tolki pa ES.
«Apłata pasutkavaja, tamu niama roźnicy, ty adpačyvaješ 1-2 sutak abo jedzieš, bo pa fakcie ŭsio adno znachodzišsia na pracy. Staŭka 80 jeŭra za sutki, ale z ulikam taho, što ŭ našaj kampanii zaŭždy znojduć, za što aštrafavać kiroŭcu, pa fakcie vychodzić 75».
Mužčyna pracuje kadencyjami pa 2-3 miesiacy, potym na miesiac jedzie damoŭ.
«Atrymlivajecca, što za miesiac zarablaješ 2200-2300 jeŭra, ale kali miesiac siadziš doma, to zarpłatu nie naličvajuć, tamu pa maich padlikach z ulikam času, jaki pravodziš doma, u siarednim vychodzić kala 1600 jeŭra ŭ miesiac.
Skandynaŭski kirunak
Krychu bolš zarablaje Pavieł, jaki taksama pracuje ŭ polskaj firmie i vykonvaje rejsy ŭ skandynaŭskija krainy.
«U mianie sutačnaja staŭka składaje 90 jeŭra, bo skandynaŭski kirunak ličycca bolš składanym. Maje kalehi, jakija jeździać pa Zachodniaj Jeŭropie, atrymlivajuć pa 75 jeŭra na tentavanach furach i pa 80 na ladoŭniach».
Na cysternie pa Hiermanii
Bolš za ŭsich surazmoŭcaŭ zarablaje Valer, jaki atrymaŭ polskaje hramadzianstva i pracuje kiroŭcam fury z cysternaj u Hiermanii.
«Miesiačnaja zarpłata składaje 3000 jeŭra, rejsy vykonvaju tolki pa terytoryi Hiermanii. Apłata stabilnaja. Tyja samyja hrošy za miesiac ja atrymlivaju jak u toj miesiac, kali kožny dzień na pracy, tak i za toj, kali paśla kadencyi jedu na dva-try tydni dadomu».
Nie tolki na furach
Mužčyna, jaki pracuje ŭ polskaj firmie kiroŭcam busa katehoryi S, za sutki pracy atrymlivaje 65 jeŭra.
«Raniej pracavaŭ na busie da 3,5 tony, tam apłata była taksama pasutkavaja, ale bolš za 45-50 jeŭra za V katehoryju nichto nie płacić, tamu paralelna vučyŭsia na kod 95 (kursy dla kiroŭcaŭ aŭto katehoryi S, S+Je) i šukaŭ pracu na hruzavik pad katehoryju S», — zhadvaje Andrej.
Mužčyna, aproč vyšejšaj staŭki, atrymaŭ bolš łahodny režym pracy, čym byŭ na lehkatanažniku.
«Na busach da 3,5 tony možna pracavać biez elektronnaha tachohrafa, dastatkova ŭručnuju vieści tachabuk. Jany pastajanna pierapisvajucca, padhaniajucca, kab było bolš pracoŭnaha času. U dadatak na małych hruzavikach niama zabarony ruchu pa niadzielach. Tamu heta piakielnaja praca ź nievysokaj apłataj», — ličyć Andrej.
Surazmoŭca, jaki ciapier pracuje na busie pad hruzavuju katehoryju S, kaža, što z ulikam staŭki 65 jeŭra ŭ sutki vučycca na katehoryju Je i pierachodzić na furu jon nie źbirajecca.
«Roźnica z apłataj dla furščykaŭ kala 10-15 jeŭra, ale pracavać na busie, choć i vialikim, značna praściej, čym na fury, tamu mianie tudy nie ciahnie», — tłumačyć mužčyna.
Čytajcie taksama:
Minimalny zarobak u Litvie ciapier 708 jeŭra. U Biełarusi taksama padros — da 152 jeŭra
Na Homielščynie znajšli novaje radovišča nafty
Kamientary