Videakanfierencyi niehatyŭna adbivajucca na pracy mozha i serca, vočnyja zaniatki i sustrečy — nie
Vydańnie The Washington Post apisała novaje daśledavańnie, u jakim vyvučałasia mazhavaja i sardečnaja aktyŭnaść ludziej padčas videakanfierencyj. Voś, da jakich vysnoŭ pryjšli navukoŭcy.
Novaje daśledavańnie, apublikavanaje ŭ časopisie Scientific Reports, pakazała, što pastajannyja i doŭhija videakanfierencyi ŭ Zoom, FaceTime, Microsoft Teams i inšych płatformach mohuć škodzić pracy mozha i serca čałavieka.
Jak heta vyznačałasia?
Navukoŭcy praanalizavali ŭpłyŭ tak zvanaj «stomlenaści ad zumaŭ» (stanu źniasileńnia paśla videazvankoŭ) na arhanizmy 35 studentaŭ adnaho z univiersitetaŭ Aŭstryi. Čalcy hrupy padzialilisia napałam i pa čarzie naviedvali to vočnyja, to dystancyjnyja zaniatki praciahłaściu 50 chvilin kožnaja.
U toj ža čas navukoŭcy praviarali stan studentaŭ pry dapamozie aparataŭ EEH (elektraencefałahramy) i EKH (elektrakardyjahramy) dla manitorynhu aktyŭnaści mozha i serca, a taksama ładzili apytanki nakont nastroju i stomlenaści ŭdzielnikaŭ hrupy.
«Metaj daśledavańnia byŭ pošuk fizičnych źmien, źviazanych sa stomlenaściu, uzbudžeńniem niervaŭ i mazhavych chvalaŭ, a taksama sa skaračeńniem sardečnaha rytmu ŭ studentaŭ. Vyniki analizu pakazali, što byli prykmietnyja adroźnieńni pamiž nastupstvami zaniatkaŭ užyvuju i anłajn.
U anłajn-studentaŭ na praciahu lekcyi ŭvieś čas pavialičvałasia stomlenaść i sanlivaść, a ich mozh z usich sił napružvaŭsia, kab viarnuć kancentracyju. A studenty, jakija vučylisia ŭžyvuju, naadvarot, byli bolš žyvymi, aktyŭnymi i ščaślivymi. Prybory nie fiksavali nijakaha paharšeńnia ich stanu», — piša The Washington Post sa spasyłkaj na navukoŭcaŭ.
Tyja adznačyli, što z ulikam vynikaŭ analizu, videakanfierencyi karyśniej razhladać tolki ŭ jakaści dadatku da realnych sustreč, a nie ich poŭnaj zamieny.
Taksama navukoŭcy zaklikali pravieści bolš maštabnaje daśledavańnie «stomlenaści ad zumaŭ» z bolšaj kolkaściu ŭdzielnikaŭ analizu.
Ciapier čytajuć
Kaleśnikava: U 2020‑m ja zmahałasia nie suprać Łukašenki, a za ludziej, svabodu i svabodnyja vybary61
Kamientary