Hałandca Marka Oviermarsa na hod adchilili ad futboła za seksualnyja damahalnictvy
Instytut spartyŭnaha prava Niderłandaŭ (ISR) adchiliŭ ad futboła Marka Oviermarsa, byłoha techničnaha dyrektara «Ajaksa», jaki ciapier zajmaje anałahičnuju pasadu ŭ bielhijskim «Antverpenie», za nastojlivuju pierapisku z seksualnym padtekstam z adnoj z supracoŭnic kłuba. Pra heta paviedamlaje miascovaje vydańnie De Telegraaf.
Marku Oviermarsu nie dazvalajecca zajmać jakija-niebudź pasady ŭ arhanizacyjach, źviazanych z futbolnaj asacyjacyjaj Niderłandaŭ, na praciahu hoda z vyprabavalnym terminam u dva hady.
Pierad vyniasieńniem vierdyktu ekśpierty vyvučyli padadzienyja aŭtaram skarhi na Oviermarsa — bolš za 300 staronak pierapiski Marka praz sacsietki za bolš čym 3,5 hoda. «Pieravažnaja bolšaść hetych paviedamleńniaŭ majuć seksualnuju afarboŭku i ŭtrymlivajuć vielmi adkryty materyjał u adnabakovaj maniery», — kanstatavaŭ dyscyplinarny kamitet. U Oviermarsa jość mahčymaść abskardzić hetaje rašeńnie.
Ciapierašni kłub i pracadaŭca Oviermarsa, bielhijski «Antvierpen», pakul nijak nie adreahavaŭ na prysud ISR.
Spartyŭny dyrektar «Ajaksa» Mark Oviermars padaŭ u adstaŭku sa svajoj pasady 7 lutaha 2022 hoda paśla taho, jak vyjaviłasia historyja pra jaho internet-damahańni da adnoj z supracoŭnic kłuba. Oviermars adpraŭlaŭ kalezie šerah paviedamleńniaŭ z seksualnym padtekstam, u tym liku dasyłaŭ joj fatahrafiju svajho pałavoha orhana.
Mark Oviermars u svoj čas byŭ viadomym futbalistam. U składzie amsterdamskaha «Ajaksa» i łondanskaha «Arsienała» jon zavajavaŭ niamała nacyjanalnych i jeŭrapiejskich trafiejaŭ, a ŭ składzie zbornaj Niderłandaŭ dvojčy (u 2000 i 2004 hadach) rabiŭsia bronzavym pryzioram čempijanata Jeŭropy i zajmaŭ čaćviortaje miesca na čempijanacie śvietu 1998 hoda.
Učora Minsk znoŭ zatapiła. Čamu stalica nie hatovaja da daždžoŭ?4
Kamientary