«Jezdžu z vystupami pa kalektyvach, a «Kruhły stoł» zharnuŭ dziejnaść». Juryj Vaskrasienski raskazaŭ, kudy jon padzieŭsia
Telehram-kanały Vaskrasienskaha i «Kruhłaha stała demakratyčnych sił» nie adnaŭlajucca miesiacami. «Radyjo Svaboda» daviedałasia, što zdaryłasia.
Ad 13 červienia nie abnaŭlajecca telehram-kanał kiraŭnika «Kruhłaha stała demakratyčnych sił» Juryja Vaskrasienskaha. Telehram-kanał samoha KSDS nie adnaŭlajecca jašče daŭžej — ad traŭnia 2022 hoda. Niama nijakaj aktyŭnaści i na sajcie KSDS.
Sam Jury Vaskrasienski staŭ radziej źjaŭlacca ŭ dziaržaŭnych ŚMI. Na sajcie dziaržaŭnaha ahienctva BiełTA apošniaja zhadka pra jaho datavanaja 29 traŭnia 2023 hoda. Partał haziety «Biełaruś siehodnia» zhadvaŭ Vaskrasienskaha 4 vieraśnia, cytujučy jahony vystup na STB. Raniej Vaskrasienski našmat čaściej fihuravaŭ u miedyja.
«Svaboda» vyrašyła spytać u dziejača, z čym źviazana jahonaja adsutnaść.
Kiraŭnik KSDS skazaŭ, što nie daje kamientaru «Svabodzie» «ŭ suviazi z pryznańniem ekstremisckim resursam», ale pahadziŭsia patłumačyć asabista žurnalistu jak hramadzianinu Biełarusi.
«Viadzieńnie kanała patrabuje času i resursu, tamu ja zasiarodziŭsia na palityčnaj aśviecie biełarusaŭ praź dziaržaŭnyja ŚMI, davier da jakich apošnim časam mocna vyras. Jezdžu z vystupami pa kalektyvach, naprykład vystupaŭ u Krupkach niadaŭna», — skazaŭ Vaskrasienski.
Jon kaža, što sapraŭdy staŭ prysutničać u dziaržaŭnych ŚMI nie tak časta, jak raniej, ale pa-raniejšamu ŭ ich zhadvajecca dastatkova rehularna.
«Jak minimum raz na tydzień vystupaju ŭ žyvych efirach na radyjo. Časta vystupaju i ŭ rasiejskich ŚMI: RBK, «Rośsija 24», «Sołov́jev Live». Palityčnuju dziejnaść zamianiŭ aśvietnickaj», — kaža Vaskrasienski.
Žurnalisty pacikavilisia, ci praciahvaje svaju pracu jašče tak zvany «Kruhły stoł demakratyčnych sił», bo apošnim časam nie było čuvać ab mierapryjemstvach pad jaho ehidaj.
«KSDS svaju dziejnaść faktyčna zharnuŭ u suviazi z vykanańniem usich pastaŭlenych zadač za apošnija try hady. Jurydyčna KSDS dziejničaje, ale pakul idzie vajna z usich bakoŭ, to čas kruhłych stałoŭ jašče nie pryjšoŭ», — pierakanany Vaskrasienski.
Taksama kiraŭnik KSDS dadaŭ, što ŭ hety momant jon znachodzicca ŭ adpačynku ŭ rasiejskim Kisłavodsku.
***
Jury Vaskrasienski ŭ minułym prajšoŭ praz abiedźvie kamunistyčnyja partyi Biełarusi: PKB (apazicyjnuju) i KPB (praŭładnuju). Byŭ deputatam Minharsavieta. Udzielničaŭ u inaŭhuracyi Łukašenki ŭ 2010 hodzie.
U 2020 hodzie staŭ siabram inicyjatyŭnaj hrupy Viktara Babaryki. 12 žniŭnia byŭ zatrymany i źmieščany ŭ SIZA KDB. Udzielničaŭ u sustrečy Łukašenki z palitviaźniami ŭ SIZA. 11 kastryčnika 2020 hoda vyjšaŭ na volu. Pačaŭ aktyŭna supracoŭničać z uładami. Jon zmoh zarehistravać «Kruhły stoł demakratyčnych sił» pa adrasie, dzie znachodziŭsia ofis Viktara Babaryki.
Vaskrasienski składaŭ śpisy palitźniavolenych na pamiłavańnie, ale amal nichto z tych śpisaŭ nie apynuŭsia na voli.
Ciapier čytajuć
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku5959
Kamientary