Kampanija Iłana Maska abviaściła nabor dobraachvotnikaŭ na vyprabavańni mazhavoha čypa. Tam spadziajucca dapamahčy całkam paralizavanym ludziam
Amierykanskaja niejratechnałahičnaja kampanija Neuralink, zasnavanaja Iłanam Maskam, abviaściła nabor udzielnikaŭ kliničnych vyprabavańniaŭ pa ŭžyŭleńni čypa ŭ mozh ludziam z paralušam. Pra heta havorycca na sajcie kampanii.
Kampanija stavić svajoj metaj złučyć mozh čałavieka z kampjutaram i dla pravierki svaich novych technałohij zaprašaje ludziej, jakija pakutujuć ad paralušu, piša BBC.
Pavodle zadumy daśledčykaŭ, užyŭleny ŭ mozh impłantat zmoža pieradavać niervovyja impulsy, jakija buduć rasšyfroŭvacca, i paralizavany čałaviek zmoža, da prykładu, nabirać tekst na kampjutary adnoj tolki siłaj dumki.
U mai paśla niekalkich niaŭdałych sprob Neuralink atrymała dazvoł ad Upraŭleńnia kantrolu jakaści charčovych praduktaŭ i lekavych preparataŭ ZŠA (FDA) na praviadzieńnie kliničnych vyprabavańniaŭ na ludziach.
Pieršapačatkova kampanija damahałasia dazvołu na ŭžyŭleńnie impłantataŭ 10 dobraachvotnikam, ale kolki ekśpierymientaŭ u vyniku joj było dazvolena pravieści, nie paviedamlajecca.
Siła dumki
Jak havorycca ŭ zajavie kampanii, u pačatku ekśpierymienta, jaki raźličany na šeść hadoŭ, robat chirurhična ŭžyvić dobraachvotnikam va ŭčastak mozha, jaki adkazvaje za ruch, 64 hnutkija sietki, tančejšyja za čałaviečy vołas.
Heta dazvolić impłantatu z batarejaj, što zaradžajecca bieskantaktna, zapisvać i pieradavać sihnały mozhu ŭ admysłovuju prahramu, zdolnuju rasšyfroŭvać, jakija ruchi maje namier zrabić čałaviek.
U kampanii kažuć, što ŭ ekśpierymientach mohuć uziać udzieł ludzi, jakija pakutujuć ad kvadryplehii, ci paralušu ŭsich čatyroch kaniečnaściaŭ, vyklikanaha traŭmaj, abo ad bakavoha amijatrafičnaha sklerozu (BAS) — zachvorvańnia, pry jakim adbyvajecca dehienieracyja niervovych kletak śpinnoha i hałaŭnoha mozha.
Kamientary