Daktary Hiermanii vystupajuć za pavyšeńnie kolkaści ambułatornych apieracyj

Daktary abaviazkovaha miedycynskaha strachavańnia (Kassenärzte)

U intervju Bild.de staršynia rady dyrektaraŭ Nacyjanalnaj asacyjacyi lekaraŭ abaviazkovaha miedycynskaha strachavańnia (KBV) Andreas Hasen (Andreas Gassen) zajaviŭ, što

«nieabchodny pierałom u rabocie. U Hiermanii ŭsio jašče zanadta šmat stacyjanarnaha lačeńnia. Z 16-ci miljonaŭ za hod try-čatyry miljony [apieracyj] mahli b vykonvacca ambułatorna».

Hasen prapanavaŭ ministru achovy zdaroŭja kančatkova vyznačyć, jakija apieracyi ŭ budučyni pavinny pravodzicca ambułatorna za adzinuju płatu. U jakaści prykładaŭ jon pryvioŭ apieracyi na pachvinie i sustavach, jakija ŭ budučyni pavinny ŭziać na siabie lekary pryvatnaj praktyki (niedergelassenen Ärzten).

Siońnia kala 90 pracentaŭ usich vypadkaŭ hryžy ŭ Hiermanii apierujuć u balnicach, u toj čas jak u Francyi tolki kala treci, a ŭ Anhlii — čverć vypadkaŭ.

Pa słovach Hasena, heta moža sekanomić kala dziesiaci miljardaŭ jeŭra za hod. Ciapier kiły ŭ pachvinie i apieracyi na sustavach u stacyjanary kaštujuć utraja daražej, čym pry ambułatornym lačeńni.

Andreas Hasen taksama padkreśliŭ, što ŭ vypadku ambułatornaha lačeńnia pacyjenty mohuć viarnucca ŭ zvykłaje asiarodździe adrazu paśla pracedury. Siarod inšaha heta moža taksama źnizić kolkaść infiekcyj, jakija vyklikajucca niebiaśpiečnymi balničnymi mikrobami.

Niamieckaje balničnaje tavarystva (Deutsche Krankenhausgesellschaft, DKG) skieptyčna pastaviłasia da prapanovy Nacyjanalnaj asacyjacyi lekaraŭ abaviazkovaha miedycynskaha strachavańnia.

«Prapanova hučyć dobra, ale jana absalutna nierealistyčnaja. Ludziam z abaviazkovaj miedycynskaj strachoŭkaj užo davodzicca čakać šmat miesiacaŭ, časam bolš za paŭhoda, pryjomu ŭ śpiecyjalista. My navat nie možam ujavić, nakolki jašče bolš pahoršała b hetaja situacyja, kali b miljony pacyjentaŭ z balnic pavinny byli b čakać ambułatornych apieracyj u kabiniecie lekara», —

skazaŭ staršynia DKG Hierald Has (Gerald Gaß) u intervju Bild.de.

Sa svajho boku, Has vystupaje za toje, kab bolš składanyja ambułatornyja apieracyi pravodzilisia ŭ balnicach. Heta dazvoliła b mieć mahčymaść dobra i jakasna reahavać na mahčymuju miedycynskuju ryzyku ŭ biaśpiečnym dla pacyjentaŭ asiarodździ.

Ź inšaha boku, jak adznačaje Hierald Has, balnicy pavinny być hatovyja lačyć usio bolš i bolš pacyjentaŭ ambułatorna ŭ najbližejšyja hady. Heta źviazana z tym, što ŭzrost lekaraŭ pryvatnaj praktyki pakazvaje, što ŭ najbližejšyja hady mnohija miedycynskija praktyki bolš nie zmohuć być zapoŭnienyja, i tamu prabieły ŭ ambułatornaj dapamozie stanuć jašče bolšyja.

U 2022 hodzie ŭ Hiermanii siarod daktaroŭ pryvatnaj praktyki bolš čym 15,5% składali śpiecyjalisty va ŭzroście starejšym za 65 hadoŭ.

U toj ža čas fiederalny ministr achovy zdaroŭja Karł Łaŭterbach u červieni hetaha hoda zajaviŭ ab mahčymym deficycie ŭ 2024 hodzie fondu abaviazkovaha miedycynskaha strachavańnia ŭ pamiery ad 3,5 da 7 miljardaŭ jeŭra.

U suviazi z hetym hučać prapanovy ab pavieličeńni ŭznosaŭ na 0,2—0,4%. Ciapier u Hiermanii staŭka ŭznosu na abaviazkovaje strachavańnie składaje 16,2%. Ich vypłačvajuć paroŭnu pracadaŭca i rabotnik.

Čytajcie jašče:

Maładyja daktary ci z dośviedam: chto dabivajecca lepšych vynikaŭ?

Ź vinavatych u DTZ spahaniajuć hrošy za vyklik chutkaj i lačeńnie paciarpiełych

• 0
• 0
• 2
• 0
• 1
• 0
• 0
• 0