Bolš za vosiem tysiač piśmieńnikaŭ patrabujuć spynić vykarystańnie ich tvoraŭ biez dazvołu ŭ prahramach štučnaha intelektu
Tysiačy piśmieńnikaŭ, u tym liku prezidentka Amierykanskaha PEN-kłuba Dženifier Ihan, kanadskaja piśmieńnica Marharet Etvud, francuzski aŭtar Mark Levi i inšyja, padpisali list z prośbaj da kiraŭnictva kampanij, jakija zajmajucca štučnym intelektam, spynić vykarystańnie ich tvoraŭ biez dazvołu abo biez vypłaty hanararaŭ, jak paviedamlaje NPR.
Źjaŭleńnie takich tekstavych prahram štučnaha intelektu, jak GPT-4 i Bard, jakija biez dazvołu skanujuć internet u pošukach kantentu aŭtaraŭ, a zatym vykarystoŭvajuć jaho dla stvareńnia novaha kantentu ŭ adkaz na zapyty karystalnikaŭ, vyklikaje ŭ piśmieńnikaŭ reŭnaść.
U paniadziełak 17 lipienia amierykanskaja niekamiercyjnaja arhanizacyja pa abaronie pravoŭ piśmieńnikaŭ The Author's Guild stvaryła list i razasłała jaho kampanijam, jakija zajmajucca štučnym intelektam, siarod jakich OpenAI, Alphabet i Meta.
«U liście havorycca, što niesumlenna vykarystoŭvać našy materyjały ŭ vašym ŠI biez dazvołu abo apłaty. Tamu, kali łaska, pačnicie kampiensavać nam vykarystańnie [našych tvoraŭ] i razmaŭlać z nami», — kaža Mery Rejzienbierhier, hienieralnaja dyrektarka The Author's Guild.
Pa słovach Mery Rejzienbierhier, hildyja sprabuje damahčysia ad kampanij urehulavańnia biez vystaŭleńnia pazovaŭ, bo sudovyja pracesy patrabujuć šmat hrošaj, a taksama zajmajuć vielizarnuju kolkaść času.
Ale niekatoryja litaraturnyja dziejačy hatovyja zmahacca z technałahičnymi kampanijami ŭ sudzie. Aŭtary, u tym liku Sara Silvierman, Poł Trembli i Mona Avad, niadaŭna padpisalisia ŭ jakaści pazoŭnikaŭ u kalektyŭnych pazovach, u jakich śćviardžajecca, što Meta i/abo OpenAI navučali svaje prahramy štučnaha intelektu na pirackich kopijach ich rabot.
Džyna Makobi, litaraturny ahient ź Ńju-Jorka, kaža, što litahienty, u tym liku jana sama, pačynajuć abmiarkoŭvać z vydaŭcami farmuloŭku ŭ kantraktach ź piśmieńnikami, jakaja zabaraniaje niesankcyjanavanaje vykarystańnie tekstaŭ štučnym intelektam. Heta sposab abaranić svaje dachody i srodki svaich klijentaŭ.
Heta maje asablivuju aktualnaść, kali ŭličyć, što, pavodle spravazdačy The Authors Guild, dachody piśmieńnikaŭ u Amierycy z 2009 pa 2019 hod źnizilisia na 42%.
Adnak, jak adznačaje Makobi, navat kali aŭtarskija kantrakty naŭprost zabaraniajuć kampanijam, jakija vykarystoŭvajuć ŠI, źbirać danyja i takim čynam atrymlivać prybytak ź litaraturnych tvoraŭ, vykanańnie hetych patrabavańniaŭ amal niemahčyma pravieryć.
«Jak naohuł daviedacca, ci jość kniha ŭ nabory danych, jaki byŭ apracavany prahramaj ŠI?» — pytajecca Džyna Makobi.
Vydaŭcy taksama zacikaŭlenyja ŭ tym, kab abaranić budučyniu svaich aŭtaraŭ, ale jany chacieli b abapiracca na niejkaje zakanadaŭstva nakont taho, jak možna i jak nielha vykarystoŭvać hienieratyŭny ŠI.
Ciapier patrebu ŭ takich zakonach šmat abmiarkoŭvajuć, ale niejkich kankretnych dakumientaŭ ci pastanoŭ niama, i nieviadoma, ci źjaviacca jany ŭ blizkaj budučyni.
Čytajcie jašče:
Čat-boty sa štučnym intelektam pišuć naviny. Jak heta źmianiaje pracu redakcyj
Pamianiali paradak dziaržrehistracyi vydaŭcoŭ, im stanie jašče ciažej
Suśvietnaja zorka Džejsan Deruła zajechaŭ u Biełaruś. Premjer Turčyn vadziŭ jaho pa Domie ŭrada8
Kamientary