Naŭsieda bajaŭsia, što praz tvit Zialenskaha «pahoršajuć rašeńni NATA»
Prezident Litvy Hitanas Naŭsieda ŭ intervju LRT raskazaŭ, što bajaŭsia paharšeńnia vynikaŭ samitu NATA praz hnieŭny tvit prezidenta Ukrainy Uładzimira Zialenskaha, jaki byŭ im apublikavany pa darozie ŭ Vilniu.
«Dramatyzm byŭ vielmi vysoki, i ŭ niejki momant u mianie, biezumoŭna, byli padstavy bajacca, abo tekst moža raptam stać našmat horšy, abo ŭ im buduć prapuščany rečy, jakija nadzvyčaj važnyja dla nas i dla Ukrainy», — skazaŭ prezident Litvy.
Hitanas Naŭsieda dadaŭ, što razumieje emocyi Zialenskaha, ale ŭ toj ža čas jon uśviedamlaŭ, što «my ŭžo dasiahnuli maksimumu i lubaja sproba pajści dalej razburyć sam Vilenski samit».
«Ja kažu heta vielmi adkazna. Heta mahło adbycca. Hetaha nie adbyłosia, i mienavita tamu my siońnia havorym u zusim inšym tonie.
Urešcie, i prezident Zialenski, jak vy vielmi dobra bačyli na nastupny dzień, havaryŭ zusim inšym tonam. I ja, biezumoŭna, vitaju rašeńni, jakija byli pryniatyja ŭ Vilni», — skazaŭ Naŭsieda.
Pa darozie ŭ Vilniu na samit NATA Zialenski rezka napisaŭ u tvitary, što ciapier siarod sajuźnikaŭ niama hatoŭnaści ni zaprasić Ukrainu ŭ NATA, ni zrabić jaje čalcom Aljansu.
Pa infarmacyi miedyja, ukrainskaja delehacyja sprabavała takim čynam paŭpłyvać na chod dyskusij u ramkach NATA, ale reakcyja była advarotnaj. Asabliva razzłavalisia ZŠA, jakich pra paviedamleńnie ŭ sacsietkach nie papiaredžvali, što prymusiła ŭmiašacca brytanskuju i častkova niamieckuju delehacyju.
Što za Dźmitryj Skindzieraŭ, jaki abviaściŭ vajnu Cichanoŭskaj? Supracoŭnictva z HUBAZiKam, daŭhi ŭ Biełarusi, daŭhi ŭ Litvie37
Kamientary