Adzior u Łondanie. Kolkaść chvorych raście i moža dasiahnuć dziasiatkaŭ tysiač
Ahienctva biaśpieki ŭ halinie achovy zdaroŭja Vialikabrytanii (UKHSA) papiaredziła, što ŭ Łondanie praź nizki ŭzrovień vakcynacyi kolkaść vypadkaŭ adru moža dasiahnuć dziasiatkaŭ tysiač. Matematyčnyja raźliki pakazvajuć, što ŭspyška moža zakranuć ad 40 tysiač da 160 tysiač čałaviek, piša Bi-bi-si.
Bolš vysoki ŭzrovień imunizacyi ŭ astatniaj častcy Vialikabrytanii aznačaje, što ŭ inšych miescach ryzyka surjoznaj epidemii značna nižejšaja.
Ale UKHSA zajaviła, što isnuje «terminovaja» nieabchodnaść vakcynacyi dziaciej, padletkaŭ i maładych ludziej.
Achop pryščepkami ad adru, epidemičnaha paratytu (bolš viadomaha jak śvinka) i krasnuchi (MMR) u Vialikabrytanii znachodzicca na samym nizkim uzroŭni za dziesiacihodździe: prykładna kožnaje dziasiataje dzicia nie abaroniena da času pastupleńnia ŭ pačatkovuju škołu.
Imunizacyja taksama rezka ŭpała ŭ pačatku 2000-ch hadoŭ, kali šyroka raspaŭsiudzilisia śćviardžeńni ab suviazi pamiž kambinavanaj vakcynaj MMR i aŭtyzmam. Hetaja teoryja paśla akazałasia całkam dyskredytavanaja, a doktar Endru Uejkfiłd, jaki prasoŭvaŭ hetuju ideju, byŭ vykraśleny ź miedycynskaha rejestra.
Adzior — adna z samych zaraznych chvarob, viadomych navucy, i ŭsio bolš ludziej nie majuć dastatkovaha imunitetu. Pavodle madelaŭ UKHSA i Łondanskaj škoły hihijeny i trapičnaj miedycyny, kolkaść vypadkaŭ adru ŭ brytanskaj stalicy moža dasiahnuć dziasiatkaŭ tysiač.
Heta tearetyčnaja ryzyka. Jana nie aznačaje, što Łondan znachodzicca na parozie bujnoj uspyški adru. Adnak u hetym hodzie ŭžo zarehistravana 128 vypadkaŭ u paraŭnańni z 54 za ŭvieś 2022 hod.
Pry apošniaj acency ryzyki miedyki vyśvietlili, što ličba R — vy, mahčyma, pamiatajecie hetuju vieličyniu z časoŭ kavidu, heta siaredniaja kolkaść ludziej, jakim infikavany čałaviek pieradaje virus, — pieravysiła abo blizkaja da 1,0, što źjaŭlajecca zychodnym punktam chutkaha raspaŭsiudžvańnia chvaroby.
Prahnozy pierš za ŭsio adnosiacca da ludziej va ŭzroście ad 19 da 25 hadoŭ, mienavita jany mahli zastacca biez patrebnych pryščepak u pieryjad piku bojazi mahčymaha aŭtyzmu. Jany mohuć być najbolš uraźlivyja. Asablivuju zaniepakojenaść vyklikajuć studenty ŭniviersitetaŭ, bo jany ciesna kantaktujuć pamiž saboj.
UKHSA taksama zajaŭlaje, što bujnaja ŭspyška moža stać dadatkovaj nahruzkaj na Nacyjanalnuju słužbu achovy zdaroŭja (NHS), bo zvyčajna ad 20% da 40% infikavanych majuć patrebu ŭ stacyjanarnaj dapamozie.
Kamientary