Premjer Niderłandaŭ idzie ŭ adstaŭku. Dziela hetaha karol navat vierniecca z adpačynku
Mark Rute na pazačarhovaj pres-kanfierencyi ŭ piatnicu ŭviečary abviaściŭ pra adstaŭku ŭrada praź niazhodu pa mihracyjnaj palitycy. Urad Niderłandaŭ jon uznačalvaje 13 hadoŭ.
Pa słovach Rute, čatyry partyi, jakija farmujuć urad Niderłandaŭ, nie zmahli pryjści da pahadnieńnia adnosna mihracyi, tamu niekatoryja ź ich vyrašyli vyjści sa składu kaalicyi, i «my nie možam hetaha paźbiehnuć». Premjer uziaŭ na siabie adkaznaść za situacyju, jak paviedamlaje «Jeŭrapiejskaja praŭda».
Zajavu pra adstaŭku Kabinieta ministraŭ Rute padaŭ karalu Niderłandaŭ Vilemu-Alaksandru ŭ piśmovaj formie, bo toj znachodziŭsia ŭ adpačynku ŭ Hrecyi. Čakajecca, što ŭ subotu karol vierniecca i prymie premjera.
Taksama čakajecca, što ŭ paniadziełak deputaty nižniaj pałaty parłamienta Niderłandaŭ źbiarucca na pazačarhovaje pasiadžeńnie, bo ŭžo pajšli na letni pierapynak, i abmiarkujuć situacyju z adstaŭkaj urada.
Rute i ŭvieś urad Niderłandaŭ buduć vykonvać svaje abaviazki da pazačarhovych vybaraŭ, jakija adbuducca nie raniej za siaredzinu listapada.
Pryčynaj adstaŭki ŭrada Niderłandaŭ stała niazhoda asobnych partyj kaalicyi z uzmacnieńniem strohaści mihracyjnaj palityki, jakaja b praduhledžvała mahčymy razvod siemjaŭ šukalnikaŭ prytułku.
U krainie, jakaja maje adnu z samych strohich mihracyjnych palityk, letaś kolkaść zajavak na prytułak vyrasła da bolš jak 46 tysiač i sioleta moža pavialičycca da bolš jak 70 tysiač.
Heta pavialičvaje nahruzku na prytułki krainy, dzie na praciahu miesiacaŭ minułaha hoda sotni biežancaŭ byli vymušanyja spać na vulicy z abmiežavanym dostupam abo naohuł biez dostupu da pitnoj vady i miedycynskaj dapamohi.
56-hadovy Mark Rute pracuje premjer-ministram Niderłandaŭ z 2010 hoda i ŭznačalvaŭ ahułam čatyry ŭrady. Jaho apošni Kabiniet ministraŭ praisnavaŭ paŭtara hoda — jon pačaŭ pracu ŭ studzieni 2022-ha.
Modnaja minskaja kaviarnia «Marks» trapiła ŭ skandał: adtul paprasili syści žančynu, jakaja malavała. Ale ŭsio nie tak adnaznačna18
Modnaja minskaja kaviarnia «Marks» trapiła ŭ skandał: adtul paprasili syści žančynu, jakaja malavała. Ale ŭsio nie tak adnaznačna
Były muž błohierki, jakaja razam z 17‑hadovym žanichom šykavała na sabranaje dla chvoraha dziciaci, raskrytykavaŭ tych, chto hetyja hrošy joj pieravodziŭ2222
Kamientary