Futbalist, jaki admoviŭsia hulać u zbornaj pry Łukašenku, pierajšoŭ u polski kłub

U minułym siezonie kłub ź Mielca zaniaŭ 11-je miesca ŭ polskaj Ekstrakłasie.

U novaj kamandzie Škuryn z ceńnikam 600 tysiač jeŭra pa Transfermarkt — samy darahi futbalist. Ahulny tranśfierny košt «Stali» składaje 3,83 młn jeŭra, jak piša «Trybuna».

U minułym siezonie 23-hadovy forvard paśpiachova vystupiŭ za «Makabi» Pietach-Tykva (Izrail, D2), dapamoh kłubu zdabyć čempijonstva i, jak śled, pavyšeńnie ŭ kłasie. Ahułam u 33 matčach siezona Škuryn vyznačyŭsia 15 hałami i 4 halavymi pieradačami.

Viadoma, adnaho z hałoŭnych haleadoraŭ «Makabi» było b nie suprać pakinuć u składzie, ale pieršyja paviedamleńni pra toje, što ŭ Izraili biełaruski forvard nie zatrymajecca, źjavilisia ŭ kancy maja: tady ŭ internecie raspaŭsiudziłasia infarmacyja, što ŭ pasłuhach Škuryna zacikaŭlenyja kłuby vyšejšych dyvizijonaŭ usio taho ž Izraila i Polščy.

Hałoŭnaja prablema ŭ kiejsie Škuryna ŭ tym, što pravy na futbalista naležać maskoŭskamu CSKA. Rasijski kłub biełarus pakinuŭ u 2021 hodzie, pierajšoŭšy ŭ arendu spačatku ŭ kijeŭskaje «Dynama» (8 matčaŭ va UPŁ i 0+4 pa «hoł+pas»), potym u polski «Rakaŭ» (2 matčy ŭ čempijanacie biez halavych dziejańniaŭ) — u abiedźviuch kalektyvach zamacavacca nie atrymałasia. Ciapier, paśla paśpiachovaj arendy ŭ «Makabi», Škuryn viarnucca ŭ Rasiju nie moža praz svaju hramadzianskuju pazicyju: Illa vystupaje suprać režymu Łukašenki i napadu rasijan na Ukrainu.

U pačatku červienia ahient futbalista Valeryj Isajeŭ paviedamiŭ, što CSKA šukaje dla Škuryna varyjanty tranśfieru ci arendy. Pakul nieviadoma, ci pierachod Illi ŭ «Stal» paŭnavartasny albo heta čarhovaja arenda.

U 2020 hodzie Illa pieršym ź biełaruskich spartoŭcaŭ publična zajaviŭ, što admaŭlajecca vystupać za kolery nacyjanalnaj kamandy na znak salidarnaści z demakratyčnymi pratestami ŭ Biełarusi.

«Pra trapleńnie ŭ pašyrany śpis zbornaj krainy znoŭ daviedajusia praz sacyjalnyja sietki, tamu svoj adkaz pišu taksama tut, — napisaŭ Illa Škuryn 15 žniŭnia 2020 hoda ŭ instrahramie. — Pradstaŭlać intaresy nacyjanalnaj kamandy ja admaŭlajusia da taho času, pakul dziejničaje režym Łukašenki. Žyvie Biełaruś».

U śniežni 2020 hoda futbalist padpisaŭ list za sumlennyja vybary i suprać hvałtu. Paśla hetaha byŭ vyklučany sa zbornaj Biełarusi i pazbaŭleny lhoty pa adterminoŭcy vajskovaj słužby.

Tahačasny staršynia ABFF Uładzimir Bazanaŭ zajaŭlaŭ, što Škuryn nie mieŭ prava admovicca pryjazdžać u zbornuju. Fiederacyja futboła navat skardziłasia ŭ FIFA, ale mižnarodnaja futbolnaja fiederacyja admoviłasia razhladać skarhu.

• 28
• 0
• 1
• 0
• 0
• 0
• 1
• 0