Prezident Hruzii pamiłavała hiendyrektara apazicyjnaha telekanała. Žurnalist — adzin z samych nieprymirymych krytykaŭ urada
Nika Hvaramija, jaki pravioŭ za kratami bolš za hod, z šyrokaj uśmieškaj i nievialikim pakietam u ruce vyjšaŭ z bramy turmy praz try hadziny paśla zajavy Sałame Zurabišvili pra jaho pamiłavańnie. Jaho sustreli na vychadzie burnymi apładysmientami.
Prezident Hruzii Sałame Zurabišvili pamiłavała hiendyrektara apazicyjnaha telekanała «Mtavary archi» i adnaho z samych zaciatych krytykaŭ kiroŭnaj partyi i ŭrada Niku Hvaramija, jak piša Bi-bi-si.
«Siońnia [22 červienia] ja padpisała akt ab pamiłavańni Nikałaza (Niki) Hvaramija. Ja pryniała hetaje rašeńnie paśla taho, jak 19 červienia byli vyčarpanyja ŭsie pravavyja stadyi, kali Viarchoŭny sud nie pryniaŭ da razhladu kasacyjny pazoŭ. Ja nie źbirajusia davać niejkija tłumačeńni nakont hetaha rašeńnia, heta majo adnamiernaje prava [prava dziejničać pa ŭłasnym mierkavańni], jakim ja siońnia skarystałasia», — skazała Sałame Zurabišvili ŭ čaćvier na śpiecyjalna sklikanym bryfinhu.
Sałame Zurabišvili była abranaja ŭ 2018 hodzie pry padtrymcy kiroŭnaj partyi «Hruzinskaja mara», ale časta vystupaje i dziejničaje nasupierak ich pazicyi.
Paśla zajavy prezidenta la turmy ŭ horadzie Rustavi stali źbiracca kalehi, palityki i blizkija Hvaramija.
Sam Hvaramija, jaki pravioŭ za kratami bolš za hod, z šyrokaj uśmieškaj i nievialikim pakietam u ruce vyjšaŭ z bramy turmy praz try hadziny paśla zajavy prezidenta pra jaho pamiłavańnie. Jaho sustreli na vychadzie burnymi apładysmientami.
«Ja, ščyra kažučy, nie čakaŭ hetaha rašeńnia i nie byŭ hatovy da hetaha, — skazaŭ jon žurnalistam. — Chaču prakamientavać zajavu, jakuju zrabiła siońnia Sałame Zurabišvili. Ja dumaju, jana zrabiła heta nie dla mianie, a dla svajoj krainy, prezidentam jakoj jana jość».
Jon nie prasiŭ ab pamiłavańni, bo nie ličyŭ i nie ličyć siabie vinavatym. Hvaramija zaklikaŭ Zurabišvili vyzvalić z-za krataŭ taksama eks-prezidenta Hruzii, ciapier źniavolenaha Michaiła Saakašvili.
Palityka i pravasudździe
Tbiliski haradski sud prysudziŭ Hvaramija da troch z pałovaj hoda pazbaŭleńnia voli pa artykule ab złoŭžyvańni paŭnamoctvami ŭ mai minułaha hoda.
Abvinavačvańni tyčylisia pieryjadu, kali Hvaramija byŭ dyrektaram telekanała «Rustavi-2». Telekanał u 2019 hodzie paśla praciahłaj sudovaj sprečki byŭ pieradadzieny adnamu z byłych uładalnikaŭ.
Paśla hetaha Hvaramija staŭ suzasnavalnikam i kiraŭnikom novaha telekanała «Mtavary archi». Telekanał, kudy pierajšła častka byłych supracoŭnikaŭ «Rustavi-2», rezka krytykavaŭ ułady.
Juryst z adukacyi, Hvaramija byŭ adnym z advakataŭ eks-prezidenta Saakašvili.
Pravaabarončyja arhanizacyi, u tym liku mižnarodnyja, zajaŭlali, što Hvaramija asudžany pa palityčnych matyvach.
Niekatoryja apazicyjaniery źviartali ŭvahu i na toje, što prysud, jaki nie zastaŭsia pa-za ŭvahaj zachodnich partnioraŭ Hruzii, byŭ vyniesieny hruzinskim sudom napiaredadni pastanovy ab nadańni Hruzii statusu kandydata ŭ ES.
Hruzija, u adroźnieńnie ad Małdovy i Ukrainy, letam minułaha hoda nie atrymała status kandydata ŭ ES — zamiest hetaha ES prapanavaŭ joj vykanać 12 rekamiendacyj, kab atrymać hety status.
Rašeńnie ab pamiłavańni Niki Hvaramija ŭžo vitali niekatoryja pravaabaroncy i žurnalisty.
Kamientary