Jeŭrasajuz dumaje ŭvieści ličbavyja šenhienskija vizy z mahčymaściu atrymańnia ich anłajn
Jeŭraparłamient i Rada ES damovilisia zrabić praceduru padačy zajaŭ na atrymańnie šenhienskich viz całkam anłajn, pra heta piša SchengenVisaInfo.com. Novaje pałažeńnie ab ličbavizacyi pracedury atrymańnia šenhienskaj vizy praduhledžvaje sistemu anłajn-zajavak i zamienu tradycyjnaj vizavaj nalepki ličbavym dvuchmiernym štrychkodam.
Na dumku Rady ES, asnoŭnaja meta — spraścić praces padačy zajavy na atrymańnie vizy i pavysić efiektyŭnaść. Akramia taho, ułady Jeŭrasajuza spadziajucca, što novyja praviły ŭmacujuć biaśpieku ŭnutry Šenhienskaj zony.
Praŭda, pra dakładnyja terminy, kali hetaja navinka moža ŭvajści ŭ žyćcio, pakul nie paviedamlajecca. Spačatku pahadnieńnie musiać uchvalić krainy — siabroŭki ES, kab paśla taho možna było pačać praceduru pryniaćcia.
Dalej budzie stvoranaja novaja płatforma dla padačy zajavak na atrymańnie šenhienskaj vizy, jakaja dazvolić usim zajaŭnikam uvodzić adpaviednyja źviestki, zahružać elektronnyja kopii prajaznych dakumientaŭ i dakumientaŭ, što paćviardžajuć asobu, a taksama apłačvać vizavy zbor. Praz hety ž veb-sajt zajaŭniki, jak płanujecca, buduć atrymlivać apaviaščeńni ab rašeńniach pa vydačy vizy.
Paśla taho asabistyja vizity ŭ konsulstvie spatrebiacca tolki asobam, jakija padajuć dakumienty ŭpieršyniu, asobam z novymi prajaznymi dakumientami i asobam z praterminavanymi bijamietryčnymi źviestkami.
Płanujecca, što šenhienskija vizy buduć vydavacca ŭ ličbavym farmacie ŭ vyhladzie dvuchmiernaha štrychkoda z kryptahrafičnym podpisam. Hetaja novaja forma nacelenaja na źmianšeńnie ryzyk, źviazanych z padroblenymi i vykradzienymi vizavymi nalepkami, što ŭmacuje cełasnaść vizavaj sistemy.
Kamientary