Zhraja kasatak patapiła ŭžo niekalki jachtaŭ kala bierahoŭ Jeŭropy i nie źbirajecca spyniacca
Usio pačałosia z adnoj vielmi pomślivaj kasatki, jakaja sabie ŭ dapamohu pačała źbirać i navučać inšych surodzičaŭ. Navukoŭcy miarkujuć, što heta adbyvajecca z-za jaje dziciačaj traŭmy.
4 maja kasatki ŭ Hibrałtarskim pralivie atakavali i patapili ŭžo treciuju łodku za niekalki miesiacaŭ. Ispanskaj bierahavoj słužbie daviałosia ratavać marakoŭ, a sudna z prabitym kasatkami padvodnym styrnom pajšło na dno. Pra heta 18 maja paviedamiŭ navukovy časopis Live Science sa spasyłkaj na miascovyja ŚMI.
Pavodle śviedčańniaŭ škipiera treciaj łodki, napad ździejśnili try kasatki: dźvie maleńkija i adna vialikaja. Maleńkija treśli łodku, a vialikaja niekalki razoŭ razhaniałasia i va ŭsiu moc jaje taraniła. Praź niekatory čas maleńkija kasatki pieraniali pavodziny svajho vialikaha surodziča i niekalki razoŭ taksama ŭrazalisia ŭ łodku.
Za dva dni da taho ŭžo inšaja zhraja z šaści kasatak napadała na jašče adzin paruśnik, i pasažyry sudna nazirali za tym, jak maci-kasatka vučyła svajo dzicia kidacca na padvodnaje styrno. Vyhladała heta jak sapraŭdnaje navučańnie.
«Pavodle daśledavańnia, apublikavanaha ŭ červieni 2022 hoda ŭ časopisie Marine Mammal Science, paviedamleńni ab padobnych sustrečach z kasatkami la bierahoŭ Ispanii i Partuhalii źjavilisia jašče ŭ mai 2020 hoda, a ź ciaham času ich rabiłasia tolki bolš. Napady ŭ asnoŭnym nakiravanyja na vietrazievyja łodki, a sami žyvioły dziejničajuć pa takoj schiemie: nabližajucca z karmy, kab udaryć pa padvodnamu rulu, a jak tolki łodka spyniajecca ci łamajecca styrno — spłyvajuć» — piša časopis Live Science.
Pry hetym bolšaść takich sustreč byli biaskryŭdnymi, adnak z 2020 hoda ich było bolš za 500. Pa słovach navukoŭcaŭ, ahresija kasatak ŭ adnosinach da jachtaŭ i inšych paruśnikaŭ — źjava dosyć novaja. Jany miarkujuć, što kasatki robiać heta naŭmysna i, vierahodna, pačałosia heta z taho, što niejkaja traŭmatyčnaja padzieja spravakavała źmieny ŭ pavodzinach adnoj z kasatak: mahčyma, u minułym hetaja žyviolina pieražyła sutyknieńnie z łodkaj albo trapiła ŭ pastku padčas niezakonnaj ci zvyčajnaj łoŭli ryby.
Jak viadoma, kasatki — vielmi sacyjalnyja i raźvityja istoty, jakija mohuć chutka vučycca i pierajmać pavodziny inšych surodzičaŭ. Tamu, napeŭna, papulacyja kasatak kala Ispanii prosta navučyłasia pierajmać ahresiŭnyja pavodziny adnoj ź ich.
«Akramia taho, kasatki takim čynam mohuć abaraniać svaju terytoryju, bo paśla pačatku takich napadaŭ užo zahinuła čatyry žyvioliny. Inšyja bijołahi, adnak, miarkujuć, što takija pavodziny dla samich kasatak — prosta hulnia, inicyjavana adnoj ci dźviuma istotami, a zatym padchoplena inšymi» — adznačaje Live Science.
Ale navukoŭcy taksama padkreślivajuć, što padobnyja sutyknieńni mohuć stać realnaj ryzykaj dla biaśpieki marakoŭ i surjoznaj prablemaj dla zachavańnia papulacyi kasatak, jakaja ŭžo znachodzicca pad pahrozaj źniknieńnia.
Kamientary