Ukrainskaje kiraŭnictva aścierahajecca, što kontrnastupleńnie moža nie apraŭdać nadziej partnioraŭ
Najvyšejšyja słužbovyja asoby Ukrainy sprabujuć źnizić uzrovień čakańniaŭ, bajučysia, što vynik kontrnastupleńnia moža nie apraŭdać nadziej sajuźnikaŭ. Pra heta piša vydańnie The Washington Post , jakoje pahutaryła z prezidentam Ukrainy Uładzimiram Zialenskim i ministram abarony Ukrainy Alaksiejem Reźnikavym.
U intervju WP na minułym tydni Alaksiej Reźnikaŭ zajaviŭ, što «čakańni ad našaj kontrnastupalnaj apieracyi pieraacenieny ŭ śviecie», pierakazvaje «UP».
«Bolšaść ludziej čakajuć čahości vializnaha», — skazaŭ jon. Na jaho dumku, heta moža pryvieści da «emacyjnaha rasčaravańnia».
«Padrychtoŭka da kontrnastupleńnia, detali jakoha zastajucca ŭ tajamnicy, pastaviła ŭkrainskich čynoŭnikaŭ pierad składanym pytańniem: jaki vynik budzie dastatkovym, kab zrabić uražańnie na Zachad, asabliva na Vašynhton?
Niekatoryja aścierahajucca, što, kali ŭkraincy pacierpiać niaŭdaču, Kijeŭ moža stracić mižnarodnuju vajskovuju dapamohu abo sutyknucca z novym ciskam z patrabavańniem ustupić u pieramovy z Maskvoj. Takija pieramovy amal napeŭna buduć uklučać rasijskija patrabavańni ab zdačy suvierennaj terytoryi, što Ukraina nazyvaje nieprymalnym», — piša WP.
«Ja vieru, što čym bolš pieramoh u nas budzie na poli boju, ščyra kažučy, tym bolš ludziej budzie vieryć u nas, a heta aznačaje, što my atrymajem bolš dapamohi», — skazaŭ Uładzimir Zialenski ŭ intervju vydańniu.
Jak adznačaje WP, častkova zavyšanyja čakańni abumoŭleny papiarednimi pieramohami Ukrainy na poli boju: spačatku praduchileńniem sproby Rasii zachapić Kijeŭ, a zatym vyciaśnieńniem akupantaŭ z apornych punktaŭ padčas niečakanych napadaŭ u Charkaŭskaj i Chiersonskaj abłaściach.
«My natchniali, tamu što ličyłasia, što my padziom na praciahu 72 hadzin», — skazaŭ Reźnikaŭ. Ale, pavodle jaho słoŭ, uličvajučy dośvied, partniory zaraz majuć «ahulnyja čakańni, što Ukraina znoŭ dasiahnie pośpiechu».
Pavodle jaho, zachodnija partniory skazali jamu, što zaraz im patrebny «nastupny prykład pośpiechu, tamu što my pavinny pakazać jaho našym ludziam».
Reźnikaŭ raspavioŭ WP, što «pieršaje šturmavoje złučeńnie» Ukrainy hatova da pačatku apieracyi bolš čym na 90%, ale niekatoryja padraździaleńni ŭsio jašče praciahvajuć navučańnie za miažoj.
Pa słovach Zialenskaha, jon budzie ličyć pośpiecham deakupacyju lubych ukrainskich terytoryj.
«Ja nie mahu vam skazać, jakija harady, jakija miežy dla nas źjaŭlajucca značnym pośpiecham, a jakija — siarednim… tolki tamu, što nie chaču rychtavać Rasiju da taho, jak, u jakich kirunkach, dzie i kali my budziem [nastupać]», — skazaŭ jon.
U ideale, pavodle Reźnikava, kontrnastupleńnie daść mahčymaść nie tolki vyzvalić vioski i harady, ale i «pierarezać materyjalna-techničnyja łancuhi [rasijskich] vojskaŭ» i «źmienšyć ich nastupalnuju zdolnaść».
Ukraina taksama prosić dać joj uzbrajeńnie dla naniasieńnia ŭdaraŭ na vialikija adlehłaści, piša WP. Partniory Kijeva ŭžo daŭno vykazvajuć aściarohi, što takoje ŭzbrajeńnie moža być vykarystana dla naniasieńnia ŭdaraŭ pa terytoryi RF, što patencyjna moža spravakavać maštabnuju eskałacyju z boku Maskvy. Ale adsutnaść takoha ŭzbrajeńnia stavić Ukrainu ŭ vielmi niavyhadnaje stanovišča, zajaviŭ Zialenski.
«Ja nie zusim razumieju, skažu vam ščyra, čamu my nie možam atrymać dalnabojnuju artyleryju», — skazaŭ jon, zapeŭniŭšy, što Ukraina nie budzie vykarystoŭvać takoje ŭzbrajeńnie dla naniasieńnia ŭdaraŭ pa terytoryi Rasii, čaho aścierahajucca niekatoryja sajuźniki.
Pa słovach Zialenskaha, mienavita z-za niedachopu dalnabojnaj artyleryi ŭkrainskija vojski paśla viartańnia Chiersona nie zmahli vycieśnić rasijskija vojski z terytoryi, jakuju jany kantralujuć na levym bierazie Dniapra.
«Jany mohuć zabrać adtul vojski i pierakinuć ich na ŭschod ci na poŭdzień. I ŭsio roŭna jany padmacoŭvajucca. Čamu? Tamu što jany viedajuć, što my nie možam da ich dastać… i my pakutujem kožny dzień, tamu što jany majuć mahčymaść stralać pa našych ludziach», — skazaŭ Zialenski.
«Jany adviali ŭsie svaje kamandnyja punkty, składy paliva, składy bojeprypasaŭ bolš jak na 120 kiłamietraŭ. Tamu nam treba niešta cikavaje z dalokaściu dziejańnia 150 kiłamietraŭ. Im stała bolš składana łahistyčna. Ale nam treba adkidać ich usio dalej i dalej», — dadaŭ Reźnikaŭ.
Ciapier čytajuć
Džefry Epštejn niekalki razoŭ atrymlivaŭ vizu ŭ Biełaruś. I dakładna naviedvaŭ našuju krainu3
Kamientary
heta chto? heta vo hety vo, što ŭ viasioleńkim chudzi?
"pastaviła ŭkrainskich čynoŭnikaŭ pierad składanym pytańniem: jaki vynik budzie dastatkovym, kab zrabić uražańnie na Zachad, asabliva na Vašynhton?"
to bok u reźnikava zadača adna - zrabić uražańnie na vašynhton? ja pravilna zrazumieła?