Uładzimiru Cyhanoviču, aŭtaru jutub-kanała MozgON, dadali da 15 hadoŭ jašče hod kałonii
U sudzie Leninskaha rajona Mahilova 10 krasavika błohiera Uładzimira Cyhanoviča asudzili pavodle č. 2 art. 411 Kryminalnaha kodeksa (złosnaje niepadparadkavańnie patrabavańniam administracyi kałonii). Sudździa Taćciana Kaściuk pryznačyła palitviaźniu jašče adzin hod kałonii ŭ dadatak da raniejšych 15. Pra novy prysud pravaabaroncam stała viadoma tolki ciapier.
Uładzimir — błohier, aŭtar jutub-kanała MozgON. Na svaim kanale pierakazvaŭ spačatku ekanamičnyja i hramadskija, a potym i palityčnyja naviny, staŭ vieści tranślacyi z roznych akcyj — nie tolki ź pikietaŭ Cichanoŭskaha. U 2019 hodzie pačaŭ vykazvacca suprać darožnaha padatku i rostu cenaŭ na bienzin. Upieršyniu vykazaŭsia pra Cichanoŭskaha vosieńniu 2019 hoda — aburyŭsia jaho zatrymańniem i zaklikaŭ pryjści na sud nad im, paźniej taksama padtrymlivaŭ Cichanoŭskaha. 31 maja 2020 hoda pravioŭ tranślacyju pikieta z Kamaroŭki, pierad jakim zatrymali Statkieviča.
U źniavoleńni palitviazień znachodzicca ŭžo amal try hady — jaho zatrymali 9 červienia 2020 hoda. Spačatku jaho dvojčy pakarali «sutkami» pavodle administracyjnych spravaŭ, a potym pieraviali ŭ SIZA ŭ miežach kryminalnaj spravy.
Cyhanoviča abvinavacili pavodle dvuch artykułaŭ Kryminalnaha kodeksa: č. 1 art. 293 KK (arhanizacyja masavych biesparadkaŭ) i č. 3 art. 130 KK (raspalvańnie sacyjalnaj varožaści).
14 śniežnia 2021 Uładzimira asudzili pa «spravie Cichanoŭskaha» da 15 hadoŭ kałonii. Spačatku palitviaźnia nakiravali dla adbyćcia pakarańnia ŭ viciebskuju kałoniju №3. Ale praz paŭhoda Uładzimiru ŭzmacnili pakarańnie i pieraviali z kałonii na turemny režym terminam na try hady.
Ale na hetym cisk na palitviaźnia nie skončyŭsia. Niekalki miesiacaŭ tamu pa inicyjatyvie administracyi mahiloŭskaj turmy №4 suprać Uładzimira raspačali novuju kryminalnuju spravu za «złosnaje niepadparadkavańnie patrabavańniam administracyi turmy» (č. 2 art. 411 KK).
Spravu pačali razhladać 7 krasavika ŭ sudzie Leninskaha rajona Mahilova. Na druhim pasiadžeńni, 10 krasavika, sudździa Taćciana Kaściuk ahučyła prysud palitviaźniu — adzin hod kałonii ŭ dadatak da 15 hadoŭ źniavoleńnia.
Ciapier čytajuć
Łukašenka raskazaŭ pra zabojstva apazicyjaniera, jakoje nibyta adbyłosia try dni tamu18
Kamientary