Bieźlimitnyja: dla pakaleńnia 20-hadovych nie prablema, kali ścirajucca miežy miž pracaj i asabistym žyćciom 

Mnohija ludzi starejšaha pakaleńnia, u tym liku i Alaksandr Łukašenka, jaki niadaŭna vykazaŭsia, što moładź nie choča pracavać, miarkujuć, što «zumiery» — ci pradstaŭniki pakaleńnia, narodžanaha pamiž 1997 i 2012 hadami, — narod lanotny i nie pierapracujecca. Adnak heta nie zusim tak.

Upartaść, metanakiravanaść i adkaznaść mohuć być ułaścivyja zumieram tak ža, jak i pradstaŭnikam papiarednich pakaleńniaŭ. Ale jość u tak zvanaha «pakaleńnia Z» i svaje admietnaści.

• «Zumiery» — pieršaje pakaleńnie, jakoje z małych hadoŭ žyvie ŭ ličbavym śviecie. Tamu bolšaść ź ich dajuć rady z hadžetami i sacyjalnymi sietkami, umiejuć filtravać ličbavuju infarmacyju i aryjentujucca ŭ najnoŭšych technałohijach. Heta daje im vializnuju kankurentnuju pieravahu.

• Pavodle apytańnia, praviedzienaha Press Club Belarus siarod miedyjamieniedžaraŭ niezaležnych biełaruskich śmi, 50% respandentaŭ zaŭvažyli, što dla zumieraŭ — praca nie na pieršym miescy. 37,5% z hetym nie pahadzilisia, astatnija mieniedžary adkazali, što nie viedajuć. Pry hetym šmatlikija suśvietnyja miedyja adznačajuć tendencyju, pavodle jakoj pakaleńnie Z nie pryviazanaje da pracy tak mocna, jak bolš stałyja hienieracyi. Zumiery mohuć stracić pracu, ale nie buduć nakont hetaha pierajmacca, bo lohka znachodiać inšuju. Jasna, što heta naŭprost źviazana i z maładościu ludziej, jakija nie majuć kredytaŭ i ni da čaho nie pryviazanyja, ale, jak słušna adznačyli ŭdzielniki apytańnia, «zrazumieć, čaho chočuć zumiery, časta składaniej, čym zrazumieć, čaho chočuć ich bolš stałyja kalehi».
• Mieniedžary i rekrutary kažuć, što addalenaja praca pieraškadžaje maładym rabotnikam znajści nastaŭnikaŭ i asvoić prafiesijnyja normy ŭ ofisie. U vyniku mnohim z hetych maładych rabotnikaŭ nie chapaje kiemlivaści, prafiesijnych suviaziaŭ i znosin z klijentami i kalehami.
• Mnohija 20— i 30-hadovyja majuć bolš vysoki ŭzrovień stresu, čym inšyja supracoŭniki. Kala pałovy toj ža metavaj hrupy kažuć, što žyvuć ad zarobku da zarobku i, takim čynam, u ich niama adčuvańnia finansavaj biaśpieki.
• Dypłom zumieraŭ — nie harantyja ich prafiesijanalizmu. Ale

jany šmat čamu zdolnyja navučycca niepasredna na miescy i naohuł majuć cikavaść da adukacyi, roznych treninhaŭ, u tym liku anłajnavych.

• Maładoje pakaleńnie nie bačyć sensu ŭ tym, kab stroha prytrymlivacca piacidzionnaha tydnia ŭ ofisie (viadoma, kali heta nie praca pa hrafiku ci z klijentami).

Pracoŭnyja zadačy možna vykonvać adkul zaŭhodna, a hrafik moža być hnutkim. Dla pakaleńnia 20-hadovych nie prablema, kali ścirajucca miežy miž pracaj i asabistym žyćciom — i ŭ hetym ich ahromnistaja pieravaha ŭ novaj ekanomicy.

• Aŭtarytetnyja viertykali nie tak mocna pracujuć dla zumieraŭ. Najlepšyja adnosiny ŭ ich składucca z tymi, chto budzie apielavać da ich jak da samakaštoŭnych asobaŭ, a nie jak da «niedaśviedčanych pradstaŭnikoŭ maładoha pakaleńnia». Moładź z novaha pakaleńnia nie ŭsprymaje, kab na ich hladzieli źvierchu ŭniz.

Čytajcie jašče:

Čamu mieniedžary-milenijały vyharajuć na pracy chutčej za inšych?

10 padarunkaŭ, jakimi možna ździvić milenijała

Jak nie chvalavacca i nie vyharać. Parady psichołaha praduktyŭnaści, jaki vykładaje amierykanskim vajskoŭcam

• 9
• 0
• 3
• 4
• 1
• 1
• 6
• 0