Skleroz. Jak raspaznać jaho pieršyja prykmiety

U čym pryčyny sklerozu

Cerebralny ateraskleroz (čaściej za ŭsio jaho sproščana nazyvajuć sklerozam) — chraničnaje zachvorvańnie, jakoje charaktaryzujecca adkładańniem chalesterynu na ścienkach sasudaŭ i ŭtvareńniem ateraskleratyčnych blašak. Paźniej na miescy adkładaŭ funkcyjanalnaja tkanka zamianiajecca ščylnaj złučalnaj tkankaj, što pryvodzić da defarmacyi i zvužeńnia sasudaŭ.

Z-za zvužeńnia sasudaŭ mozh nie zabiaśpiečvajecca nieabchodnaj kolkaściu kryvi, a ź joj — pažyŭnymi rečyvami i kisłarodam. U vyniku ŭ čałavieka ŭźnikajuć kahnityŭnyja prablemy i prablemy z pamiaćciu.

Vučonyja nie mohuć nazvać pryčynu hetaj chvaroby. Bolšaść pahadžajecca z tym faktam, što ŭ asnovie cerebralnaha aterasklerozu lažyć parušeńnie abmienu tłuščaŭ na ŭzroŭni hienietyčnaj schilnaści.

Chvarobie sadziejničaje kureńnie. Jano jość najbolš niebiaśpiečnym faktaram. Istotnymi faktarami zjaŭlajucca cukrovy dyjabiet, atłuścieńnie, małaruchomy ład žyćcia. Akramia hetaha, raźvićciu chvaroby moža paspryjać emacyjnaje pieranapružańnie, niapravilnaje charčavańnie, užyvańnie vialikaj kolkaści ałkaholu.

U hrupie ryzyki — tyja ludzi, jakija majuć pavialičany pakazčyk chalesterynu, pakutujuć na arteryjalnuju hipiertenziju i homacysteiniemiju (spadčynnaje zachvorvańnie, što pryvodzić da pavieličeńnia białku homacysteinu ŭ kryvi).

Pieršyja prykmiety sklerozu

Daktary papiaredžvajuć, što, choć na cerebralny ateraskleroz najbolš pakutujuć ludzi paśla 60 hadoŭ, jaho pieršyja prykmiety zjaŭlajucca našmat raniej — u 20-40 hadoŭ. Ale na ich nie źviartajuć uvahi.

Na pačatkovaj stadyi chvaroby raźvivajecca nieŭrasteničny sindrom. Jon prajaŭlajecca słabaściu i chutkaj stomlenaściu, jakija paźniej źmianiajucca chraničnaj stomlenaściu i razdražnialnaściu. U chvoraha zjaŭlajucca hałaŭnyja boli i rezkija źmieny nastroju, tryvožnyja i paničnyja dumki.

Čałaviek skardzicca na toje, što jamu ciažka kancentravać uvahu, a paźniej i na prablemy z pamiaćciu. Pryčym zabyvajucca ŭ pieršuju čarhu padziei, jakija adbylisia ŭ niadaŭnim minułym.

Važnaja prykmieta nieŭrasteničnaha sindromu — parušeńnie snu. Čałaviek sanlivy ŭdzień, ale ŭviečary nie moža zasnuć, maje niespakojny son.

Jak raźvivajecca skleroz

Na druhoj stadyi stan horšaje. Chvory maje značnyja prablemy z pamiaćciu, zabyvaje terminy i słovy, jakija dahetul biez prablem užyvaŭ u paŭsiadzionnym žyćci. U jaho nazirajucca pierapady nastroju, paharšajecca kantrol emacyjnaha stanu, adbyvajecca dehradacyja sacyjalnych pavodzin ci matyvacyi.

Jon stračvaje cikavaść da pačućciaŭ inšych ludziej, stanovicca ehaistyčnym. Akramia hetaha, čałaviek hublaje aryjentacyju na miascovaści padčas prahułak ci kiravańnia aŭtamabilem, adčuvaje ciažkaści pry vykanańni paŭsiadzionnych zadač. Charakternym simptomam na hetaj stadyi jość pavyšeńnie apietytu.

Poźniaja stadyja sklerozu

Ź ciaham času nieŭrałahičnyja prykmiety sklerozu ŭzmacniajucca. Jany navat nahadvajuć chvarobu Alchiejmiera. Čałaviek, jaki zmahajecca sa sklerozam, adčuvaje simptomy matornaj apraksii (nie moža rabić dakładnyja ruchi). U jaho zaŭvažnyja prablemy z kaardynacyjaj. U chvoraha źnižajecca siła ciahlic. Jon adčuvaje skavanaść kaniečnaściaŭ. Akramia hetaha, nazirajucca prykmiety chvaroby Parkinsana. Naprykład, tremar spakoju (dryhacieńnie ŭ stanie spakoju).

Jak praduchilić skleroz

Hałoŭnaje ŭ prafiłaktycy sklerozu — heta źmiena zvyčak. Rekamiendujecca kinuć kuryć i pić ałkahol, źmianić racyjon charčavańnia. Treba paźbiahać užyvańnia praduktaŭ, bahatych tłuščami (fastfud, tłustaje miasa), a bolš jeści harodniny i sadaviny, bahatych klatčatkaj.

Abaviazkovaj pavinna być fizičnaja aktyŭnaść, chadźba, praktykavańni na treniroŭku mozhu (razhadvańnie kryžavanak, rebusaŭ, nastolnyja hulni, jakija trenirujuć uvažlivaść).

Daktary rajać pieryjadyčna praviarać arteryjalny cisk i zdavać analiz na ŭtrymańnie hlukozy ŭ kryvi. U vypadku adchileńnia ad normy treba jak maha chutčej źviarnucca da doktara.

Treba pamiatać, što skleroz (cerebralny ateraskleroz) — heta nievylečnaje zachvorvańnie, jakoje prahresuje. Lačeńnie moža tolki zapavolić jaho raźvićcio. Tamu, čym chutčej chvaroba budzie dyjahnastavana, tym bolš šancaŭ pražyć daŭžej.

Čytajcie jašče:

Choład moža dapamahčy ŭ lačeńni chvaroby Alchiejmiera i Parkinsana

Zvyčajnaje rečyva dla chimčystki moža być pryčynaj chvaroby Parkinsana, kažuć navukoŭcy

Źmiena zvyčak zapavolvaje stareńnie

• 23
• 0
• 3
• 4
• 3
• 9
• 7
• 0