Čarhovy sud nad žurnalistam. Pačynajecca praces nad Kanstancinam Załatych
U Minsku pačynajecca sud nad palitźniavolenym dyrektaram haziety «Biełarusy i rynak», paviedamlaje «Viasna».
Załatych abvinavačvajuć pavodle čatyroch artykułaŭ Kryminalnaha kodeksa: č. 2 art. 130 (raspalvańnie rasavaj, nacyjanalnaj, relihijnaj abo inšaj sacyjalnaj varožaści abo varažniečy), č. 1 art. 368 (abraza Łukašenki), art. 369 (źniavaha pradstaŭnika ŭłady), č. 2 art. 426 (pieravyšeńnie ŭłady abo słužbovych paŭnamoctvaŭ).
Spravu viadzie sudździa Alena Šylko.
Kanstancina Załatych zatrymali jašče 18 maja 2022 hoda paśla vobšuku ŭ redakcyi. Jamu pieršapačatkova vystavili kryminalnaje abvinavačańnie pa č. 2 art. 130 Kryminalnaha kodeksa Biełarusi (raspalvańnie varožaści, spałučanaje z hvałtam albo ździejśnienaje słužbovaj asobaj).
Palitviazień adrazu znachodziŭsia ŭ žodzinskim SIZA, na pačatku žniŭnia 2022 hoda byŭ pieraviedzieny ŭ SIZA-1 na Vaładarskaha.
Pa materyjałach śledstva, Kanstancin Załatych, «źjaŭlajučysia dyrektaram ZAT «Miedyjarynak», viedaŭ ab uniesienych u Zakon Respubliki Biełaruś «Ab srodkach masavaj infarmacyi» źmienach, jakija pieraškadžali dvum hramadzianam Respubliki Polšča vałodać sumarna 28% akcyj tavarystva.
Z hetaj metaj u mai 2021 — studzieni 2022 hoda jon, u parušeńnie zakanadaŭstva, biez praviadzieńnia ahulnaha schodu akcyjanieraŭ, adnaasobna ŭnios źmieny ŭ Statut ZAT ab vyklučeńni sa składu zasnavalnikaŭ vyšejzhadanych zamiežnych hramadzian i zarehistravaŭ jaho ŭ Hałoŭnym upraŭleńni justycyi Minskaha harvykankama. Zatym razam ź inšymi dakumientami pradstaviŭ u Ministerstva infarmacyi, što stała padstavaj dla praciahu tavarystvam svajoj dziejnaści, a im adpaviedna — zachavańnia pasady dyrektara».
Aproč hetaha, žurnalistu stavicca ŭ vinu niekalki epizodaŭ z raźmiaščeńniem abraźlivych kamientaroŭ u adras aficyjnych asob i Alaksandra Łukašenki ŭ sacyjalnych sietkach.
Sudovy praces prachodzić pakul što ŭ adkrytym režymie.
Nahadajem, što ŭčora byli vyniesieny prysudy Dźmitryju Siemčanku i Hienadziu Mažejku, a taksama stała viadoma, što suprać redaktara «Rehijanalnaj haziety» Alaksandra Manceviča zaviedziena kryminalnaja sprava.
Usiaho za kratami znachodzicca 36 žurnalistaŭ i supracoŭnikaŭ miedyja.
Ciapier čytajuć
Vaskrasienski: Adkryvajecca nieba — i Aleś Bialacki adrazu vychodzić29
Kamientary