«Akupantaŭ nie absłuhoŭvajem». Asudzili dyrektara kramy aŭtazapčastak, jaki admoviŭsia pradavać tavar rasijskim vajskoŭcam

Mužčynu abvinavacili pavodle art. 190 Kryminalnaha kodeksa (parušeńnie raŭnapraŭja hramadzian). Sudździa Arciom Padalaniec pa zaprosu prakurorki Śviatłany Pasiemki pryznačyŭ Viktaru štraf u pamiery 300 bazavych vieličyń (11100 rubloŭ). Indyvidualnaja dziejnaść Makarenki, jakuju jon ažyćciaŭlaŭ z 1993-ha hoda, spynienaja pa rašeńni ekanamičnaha suda pa isku miascovaha prakurora, paviedamlaje «Viasna».

Što zdaryłasia?

28 kastryčnika 2022 hoda adzin z praŭładnych telehram-kanałaŭ apublikavaŭ post, dzie raspavioŭ pra zatrymańnie ŭ Baranavičach dyrektara kramy aŭtazapčastak. Pavodle ich, mužčyna skazaŭ svajmu padnačalenamu: «Nie prodavaj im ničieho, oni okkupanty». Pad akupantami mielisia na ŭvazie vajskoŭcy Rasijskaj Fiederacyi.

Dyrektara kramy aŭtazapčastak zatrymali. Praŭładny telehram-kanał śćviardžaŭ, što paśla zatrymańnia znajšlisia dokazy ŭdziełu mužčyny ŭ pratestach 2020 hoda, a taksama fakty zroblenych paśla 24 lutaha hrašovych pieravodaŭ na Uzbrojenyja siły Ukrainy.

Mužčynu sapraŭdy zatrymlivali ŭ miežach kryminalnaj spravy pavodle art. 190 Kryminalnaha kodeksa (parušeńnie raŭnapraŭja hramadzian) na troje sutak, a taksama aryštoŭvali na 15 sutak pavodle art. 19.11 KaAP (raspaŭsiudžvańnie ekstremisckich materyjałaŭ).

Da suda mužčyna byŭ na voli.

U čym jaho abvinavacili ciapier?

Zhodna ź viersijaj abvinavačvańnia, Makaranka, źjaŭlajučysia indyvidualnym pradprymalnikam, 20 kastryčnika 2022 hoda z 9:30 da 11:30 «naŭmysna na hlebie niehatyŭnaha niepryjacielskaha staŭleńnia da vajennasłužačych Rasijskaj Fiederacyi, jakoje ŭźnikła ŭ suviazi sa śpiecyjalnaj vajennaj apieracyjaj na terytoryi Ukrainy, jakuju pravodzić Rasijskaja Fiederacyja, u parušeńnie roŭnaści pravoŭ, svabod čałavieka i hramadzianina, stvaryŭ pieraškodu dla poŭnaj realizacyi pravoŭ i svabod šlacham admovy im jak ułaśnik kramy ŭ absłuhoŭvańni i realizacyi tavaraŭ — zapčastak dla aŭtamabilnaj techniki vajskoŭcam, hramadzianam Rasijskaj Fiederacyi Barachcinu Dzianisu Alehaviču i Hałaŭko Alaksandru Jaŭhienaviču. A taksama dačy niapravilnych ukazańniaŭ pradaŭcu, tym samym abmiežavaŭšy prava na roŭny dostup i svabodny vybar tavaru, praduhledžany artykułam 10 Zakona ad 9 listapada 2002 hoda «Ab abaronie pravoŭ spažyŭcoŭ».

Takim čynam, Makaranka «ździejśniŭ naŭmysnaje abmiežavańnie pravoŭ i svabod hramadzian u zaležnaści ad nacyjanalnaści i słužbovaha stanovišča, pryčyniŭ istotnuju škodu pravam, svabodam i zakonnym intaresam hramadzian, tym samym ździejśniŭ złačynstva, praduhledžanaje artykułam 190 Kryminalnaha kodeksa».

Ci pryznaŭ vinu abvinavačany?

Viktar Makaranka zajaviŭ, što pryznaje siabie vinavatym tolki ŭ tym, što pakryŭdziŭ paciarpiełych. Jon adznačyŭ na pracesie, što rasijskija vajskoŭcy nie mieli pretenzij da jaho, a inicyjataram zaviadzieńnia kryminalnaj spravy staŭ mienavita biełaruski vajskoviec.

Na sudzie Viktar raspavioŭ, što 20 kastryčnika 2022 hoda jon zajšoŭ u kramu i ŭbačyŭ troch vajskoŭcaŭ, u dvaich ź ich na rukavach byli šaŭrony ź litaraj «Z». Ni da kaho nie źviartajučysia, jon skazaŭ takija słovy: «Okkupantov my nie obsłuživajem». Paśla hetaha adzin z hetych sałdat skazaŭ: «A otčieho vy sčitajetie nas okkupantami?» Na heta Viktar skazaŭ: «Potomu čto vaša armija vtorhłaś v Ukrainu i ubivajet tam ludiej». Dyrektar kramy rastłumačyŭ, što nijakich ukazańniaŭ pradavačcy jon nie davaŭ. Jana praciahvała ich absłuhoŭvać, u tym liku biełaruskaha vajskoŭca. Pry hetym adzin vajskoviec, vierahodna, razzłavaŭsia i vyjšaŭ z zały. Što charakterna, biełaruski vajskoviec nabyŭ usio ž taki ŭ hetaj kramie zapčastki dla svaich kaleh — u materyjałach spravy majecca adpaviedny ček.

Na sudzie dapytali tolki biełaruskaha vajskoŭca Dźmitryja Biejdziuka z vajskovaj častki 97035, jaki prychodziŭ u kramu z vajskoŭcami Rasijskaj Fiederacyi. Apošnich na sudzie nie dapytali, pakolki «majecca infarmacyja, što jany znachodziacca za miežami Respubliki Biełaruś i horada Baranavičy». Na sudzie začytali ich pakazańni, dadzienyja padčas dopytaŭ na papiarednim śledstvie i na vočnaj staŭcy.

Biełaruski vajskoviec raspavioŭ, što ŭ kastryčniku znachodziŭsia ŭ słužbovaj kamandziroŭcy na 230-m ahulnavajskovym palihonie. Ranicaj 20 kastryčnika atrymaŭ zahad supravadzić vajskoŭcaŭ Rasijskaj Fiederacyi ŭ horad Baranavičy dla nabyćcia zapčastak u słužbovyja aŭtamabili. U kramie i adbyŭsia incydent.

Prakurorka Śviatłana Pasiemka zaprasiła dla Makaranki štraf u pamiery 300 bazavych vieličyń (11100 rubloŭ). Sudździa Arciom Padalaniec pryznačyŭ mienavita takoje pakarańnie.

Jašče da suda baranavicki prakuror nakiravaŭ isk u ekanamičny sud ab spynieńni dziejnaści indyvidualnaha pradprymalnika Makaranki. 19 śniežnia 2022 hoda ekanamičny sud spyniŭ jaho dziejnaść. Indyvidualnym pradaprymalnikam Viktar Makaranka pracavaŭ z 1993-ha hoda. Ciapier mužčyna znachodzicca na piensii.

• 5
• 0
• 4
• 6
• 6
• 8
• 108
• 0