Były achoŭnik pasolstva Brytanii ŭ Bierlinie atrymaŭ 13 hadoŭ za špijanaž na karyść Rasii
U Łondanie vyniesieny prysud Devidu Śmitu, jaki raniej pryznaŭsia ŭ špijanažy na karyść Rasii. Były achoŭnik pasolstva Vialikabrytanii ŭ Bierlinie asudžany da 13 hadoŭ i dvuch miesiacaŭ pazbaŭleńnia voli, piša Bi-bi-si.
58-hadovy Śmit pryznany vinavatym u pieradačy rasijskim čynoŭnikam i śpiecsłužbam infarmacyi pra supracoŭnikaŭ pasolstva, a taksama ŭ zbory dadatkovych źviestak ab dziejnaści brytanskich dypłamataŭ.
«Dzie vy budziecie adbyvać pryznačanaje pakarańnie, vyrašać užo nie mnie», — źviarnuŭsia da asudžanaha sudździa Mark Uoł paśla abviaščeńnia prysudu.
Ad hetaha, udakładniŭ sudździa, budzie zaležać minimalny termin turemnaha źniavoleńnia. U siabie na radzimie, u Brytanii, Śmit moža raźličvać na ŭmoŭna-daterminovaje vyzvaleńnie, u adroźnieńnie ad Hiermanii, dzie zakanadaŭstva ŭ hetaj śfiery adroźnivajecca.
Špijon-dobraachvotnik?
Zhodna z materyjałami abvinavačańnia, prynamsi, ź listapada 2020 hoda abvinavačany pieradavaŭ vajskovamu ataše Rasii ŭ Hiermanii sakretnyja materyjały ab pasolstvie Brytanii ŭ Bierlinie, dzie Śmit pracavaŭ achoŭnikam.
Aryštavany ŭ žniŭni 2021 hoda padčas sumiesnaj apieracyi brytanskich i niamieckich śpiecsłužbaŭ, spačatku jon kateharyčna admaŭlaŭ usie abvinavačvańni ŭ svoj adras.
U krasaviku minułaha hoda Śmit byŭ ekstradziravany na radzimu i paŭstaŭ pierad mahistrackim sudom u Vestminstery, dzie znoŭ admoviŭsia pryznać svaju vinu.
Tady sprava ab špijanažy była nakiravanaja ŭ kryminalny sud łondanskaha Sici, a sam padsudny — u turmu strohaha režymu Biełmarš na ŭschodzie Łondana.
Žurnalisty spačatku taksama nie mahli zrazumieć, adkul u zvyčajnaha achoŭnika moh źjavicca dostup da jakich-niebudź sakretnych dypłamatyčnych źviestak.
Adnak padčas rasśledavańnia vyśvietliłasia, što Śmit rabiŭ kopii zapisaŭ ustalavanych na budynku ambasady kamier videanazirańnia, a taksama źbiraŭ sakretnaje daśje z asabistymi źviestkami brytanskich ahientaŭ.
U vyniku jamu ŭdałosia sabrać masu sakretnych dakumientaŭ, jakija mahli być karysnyja rasijskaj raźviedcy, bo ŭtrymlivali danyja ab dziejnaści brytanskich dypłamataŭ i inšych čynoŭnikaŭ, a taksama infarmacyju ab ich asobach, adrasach i numarach telefonaŭ.
Abvinavačvańnie śćviardžała, što ŭsio heta padsudny pieradaŭ vajskovamu ataše ambasady Rasii, i ŭrešcie Śmit pahadziŭsia pryznać fakt špijanažu, adnak pa-raniejšamu nastojvaje, što nijakich hrošaj ad rasijan za heta nie atrymlivaŭ.
Ciapier čytajuć
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ2
Kamientary