Bellingcat: Va Ukrainie zabityja troje kryminalnych aŭtarytetaŭ, jakija prybyli vajavać u składzie hrupy Vahniera

Andrej Bieražnych

U 2013 hodzie Viarchoŭny sud Rasii asudziŭ Andreja Bieražnych da 25 hadoŭ pazbaŭleńnia voli za zabojstva i šerah inšych pravaparušeńniaŭ, učynienych padčas jaho kiraŭnictva nievialikaj bandaj u Sarataŭskaj vobłaści z 1994 pa 2011 hod. Raniej Bieražnych taksama sudziŭ Sarataŭski sud za zamach na zabojstva jašče 10 čałaviek.

Bieražnych arhanizavaŭ svaju bandu ŭ siaredzinie 90-ch u Bałakova, prykładna za 150 kiłamietraŭ ad abłasnoha centra Saratava. Banda dziejničała amal 20 hadoŭ. Žurnalistam jon raspaviadaŭ, što złačynnuju hrupoŭku sfarmavaŭ paśla zabojstva svajho načalnika, žadajučy adpomścić za śmierć svajho «blizkaha siabra».

Jak uspaminaŭ Bieražnych, nieŭzabavie ŭ hrupoŭku ŭstupili novyja členy i pačałasia «kamiercyja» — AZH zaniałasia handlem zbrojaj. 6 kastryčnika 1994 hoda Bieražnych i jaho kaleha Andrej Kurpač z paŭaŭtamatyčnymi vintoŭkami napali na hrupu maładych ludziej, jakija vychodzili sa spartzały, zabiŭšy traich. Bieražnych i jaho hrupa na praciahu mnohich hadoŭ ździejśnili šerah inšych zabojstvaŭ i zamachaŭ, achviarami jakich stali, u liku inšych, miascovyja ŭładalniki biznesaŭ.

U 2003 hodzie złačynnaja hrupa Bieražnych pryznałasia ŭ napadzie na Sarataŭskuju telekampaniju STV z užyvańniem, jak adznačajecca ŭ materyjałach Sarataŭskaha suda, hranatamiota RPH-26. Telegram-kanał, pryśviečany kryminalnamu śvietu Rasii, śćviardžaje, što Bieražnych zahinuŭ padčas boju va Ukrainie 8 śniežnia 2022 hoda — praź miesiac paśla taho, jak byŭ zavierbavany ŭ hrupu Vahniera. Praź miesiac paśla jaho śmierci, padčas Kalad u jaho honar prajšła słužba ŭ Bałakoŭskim sabory Śviatoj Trojcy.

Siarhiej Maksimienka

Siarhiej Maksimienka da viarboŭki ŭ PVK adbyvaŭ 25-hadovy termin źniavoleńnia ŭ Respublicy Mardovija. Miarkujučy pa publikacyjach ŚMI, jon zapisaŭsia ŭ najmity PVK Vahniera ŭ vieraśni 2022 hoda. Maksimienka ŭznačalvaŭ u Pienzie złačynnuju hrupu pad nazvaj «Alimpija», jakaja na praciahu 1990-ch i 2000-ch hadoŭ zajmałasia arhanizacyjaj prastytucyi, vymahalnictvam i zabojstvami. Pad svoj kantrol hrupu «Alimpija» Maksimienka ŭziaŭ u 1997 hodzie, AZH zajmałasia rekietam i lichviarstvam. Na pačatku 2000-ch «Alimpija» ździejśniła šerah zabojstvaŭ — u asnoŭnym uładalnikaŭ miascovaha biznesu i lidaraŭ band. U 2003 hodzie členy AZH napali na siemiarych mužčyn i ich žonak u miascovym bary ź biejsbolnymi bitami i palaŭničymi strelbami. Jak i Bieražnych, Maksimienka zahinuŭ u śniežni 2022 hoda.

Ihar Kusk

Ihar Kusk adbyvaŭ 23-hadovy termin źniavoleńnia ŭ Syktyŭkary, stalicy Respubliki Komi. Kusk byŭ vieteranam vajny ŭ Afhanistanie. Adpravicca va Ukrainu jon zachacieŭ jašče da taho, jak u kałonii pačali jeździć rekruciory hrupy Vahniera, pra heta žurnalistam raspaviała jaho žonka.

Da viarboŭki jon sprabavaŭ trapić da kadyraŭcaŭ i adpravicca na front ź imi. Sudovyja dakumienty ź jaho prysudu 2015 hoda padrabiazna apisvajuć, jak Ihar Kusk u 1998 hodzie ŭ Tatarstanie stvaryŭ svaju złačynnuju hrupu, nazvanuju ŭ jaho honar — «kuskaŭskija». Jana była asabliva aktyŭnaja ŭ Nižniakamsku i bujnym krajavym centry — Kazani. Kuskaŭskija adroźnivalisia tym, što ŭ ich šerahach było niamała vieteranaŭ vajny ŭ Afhanistanie. Pieršapačatkova banda Kuska, jak i bandy Bieražnych i Maksimienki, u kancy 90-ch hadoŭ zajmałasia adnosna małaprykmietnymi złačynstvami i zakaznymi zabojstvami.

Pavodle sudovych dakumientaŭ, ich pieršym viadomym zabojstvam u 1998 hodzie było zakaznoje zabojstva miascovaha elektryka, zastrelenaha kala jaho doma ranicaj 30 śniežnia. U 2004 hodzie Kuska i jaho hrupu abvinavacili ŭ zabojstvie dvuch dyrektaraŭ Kazanskaj budaŭničaj kampanii «Tatsantechmantaž», u jakoj na piku papularnaści pracavała bolš za 1000 čałaviek. Budaŭničaja kampanija źviazałasia sa złačynnaj hrupaj, i hetyja dva zabojstvy, pa viersii rasijskaj prakuratury, byli źviazanyja sa sprobami hiendyrektaraŭ adviazacca ad «kuskaŭskich».

Hienieralny dyrektar Vasil Łuzhanaŭ byŭ zabity ŭ 2001 hodzie paśla zvalnieńnia vysokapastaŭlenaha supracoŭnika, jaki zajmaŭsia zakupačnaj afioraj. Hiendyrektar Barys Vajman byŭ zabity «kuskaŭskimi» za «viadzieńnie biznesu, jaki supiarečyć ustanoŭkam» złačynnaj hrupoŭki.

Kali pachavańnie kryminalnych aŭtarytetaŭ Bieražnych i Maksimienki prajšło davoli ścipła, to pachavańnie Kuska stała prykmietnaj padziejaj — pa danych ŚMI, na panichidzie i pachavańni prysutničała bolš za 700 čałaviek, u pracesii ŭdzielničała kala 100 aŭtamabilaŭ.

• 18
• 0
• 3
• 14
• 2
• 5
• 9
• 0