Jak viadoma, Aleś Puškin znachodzicca za kratami z sakavika 2021 hoda. Pavodle Hienprakuratury, mastak «ździejśniŭ dziejańni, nakiravanyja na prapahandu nacyzmu i dziejnaści biełaruskich kałabaracyjanisckich arhanizacyj«. Majecca na ŭvazie raźmiaščeńnie na vystavie ŭ Hrodnie partreta ŭdzielnika paślavajennaha biełaruskaha antysavieckaha ruchu Jaŭhiena Žychara.
30 sakavika 2022 sud pryznaŭ Puškina vinavatym i pryznačyŭ jamu 5 hadoŭ źniavoleńnia ŭ kałonii strohaha režymu.
Paźniej jon byŭ etapavany ŭ papraŭčuju kałoniju №22, ale ŭ listapadzie minułaha hoda sud pastanaviŭ pieravieści Alesia Puškina na turemny režym terminam na paŭtara hoda. Ciapier mastak znachodzicca ŭ Hrodzienskaj turmie №1.
— Listy ad Alesia prychodziać redka, — kaža Janina Puškina, žonka mastaka. — Pakolki jon znachodzicca na strohim režymie, to jamu nie dazvolenyja pieradačy. Voś muž i piša, što ŭ takich umovach vielmi chočacca źjeści što-niebudź smačnaje, ale situacyja nie dazvalaje atrymać takuju asałodu.
Aleś paviedamiŭ, naprykład, što skidvajucca hrašyma, kuplajuć u miascovym bufiecie cybulu, razrazajuć jaje i častujucca štodzień. Heta, nakolki ja zrazumieła, u ich adziny vitaminny pradukt — pałova cybuliny na dzień. Uvohule, za miesiac možna kupić u bufiecie niešta z praduktaŭ na 32 rubli.
— Pra zdaroŭje ničoha nie paviedamlaje?
— Napisaŭ, što nie moža jeści śviežy turemny chleb, bo jašče raniej, kali słužyŭ u Afhanistanie, pierachvareŭ na chvarobu Botkina. Tamu toj chleb užyvaje tolki ŭ padsušanym vyhladzie.
— Niejkija knihi ŭ turmie Aleś, napeŭna ž, čytaje…
— My vypisali jamu hazietu «Litaratura i mastactva», a taksama časopis «Mastactva». Znajomicca z apošnimi navinami ŭ halinie kultury, paviedamiŭ, što ŭ jaho źjaviłasia vialikaje žadańnie namalavać partret łaŭreata Dziaržaŭnaj premii, teatralnaha režysiora Valeryja Maśluka, jakomu ŭ sakaviku hetaha hoda spoŭniłasia b 70 hod.
Taksama chacieŭ by namalavać partret aŭtara pieršaj biełaruskaj hramatyki Branisłava Taraškieviča, jaki ŭ svoj čas taksama siadzieŭ u Hrodzienskaj turmie. Tamu paprasiŭ mianie, kab dasłała jamu fota hetych asob.
— Miarkujecie, Alesiu dazvolać u turmie malavać partrety?
— Voś heta ja dakładna nie viedaju. Ale zrablu tak, jak muž prasiŭ…
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ3
Kamientary