Asudzili praparščyka, jaki navodziŭ dyscyplinu ŭ svajoj rocie pistaletam
U Minsku asudžany staršy praparščyk, jaki stralaŭ u padnačalenych ź pnieŭmatyčnaha pistaleta, vykarystoŭvaŭ suprać ich śpiecsrodki i źbivaŭ. Ad dziejańniaŭ kamandzira roty adnoj z vajskovych čaściej paciarpieli 18 vajskoŭcaŭ terminovaj słužby, paviedamlaje słužba infarmacyi prakuratury horada Minska.
Staršy praparščyk sprabavaŭ takimi mietadami padtrymlivać u padraździaleńni dyscyplinu i damahacca vykanańnia zahadaŭ. Praciahvałasia heta ŭsio ź lutaha 2021 da studzienia 2022 hoda.
Kryminalnuju spravu razhladaŭ sud Zavodskaha rajona Minska. Sudzili vajskoŭca za «pieravyšeńnie ŭłady načalnikam, spałučanaje z hvałtam i vykarystańniem śpiecyjalnych srodkaŭ». Svaju vinu jon pryznaŭ.
U vyniku byłomu kamandziru prysudzili 5 hadoŭ pazbaŭleńnia voli, štraf u pamiery 4,8 tysiačy rubloŭ i pazbaŭleńnie na 5 hadoŭ prava zajmać pasady, źviazanyja z vykanańniem arhanizacyjna-rasparadčych abaviazkaŭ. Taksama jaho pazbavili vajskovaha zvańnia «staršy praparščyk», a pnieŭmatyčny pistalet kanfiskavali.
Hrachi praparščyka-«biespradzielščyka», praŭda, nie takija vialikija, jak u tych, chto napisaŭ kamientar u internecie ci vyjšaŭ sa ściaham na mirnuju demanstracyju. Tamu jon patrapiŭ pad amnistyju. Zhodna ź joj termin pakarańnia jamu adrazu skaracili na adzin hod.
Kamientary